Ջոկատայիններին թույլ չեն տալիս բարձրանալ դիրքերը պահելու. Ռաֆայել Քոչարյան

«Սևքարեցի Սաքո» ռազմա-հայրենասիրական ՀԿ ֆիդային մահապարտների ջոկատի անդամները ահազանգում են՝  ջոկատայիններին թույլ չեն տալիս բարձրանալ դիրքեր և պահել այն: Այս մասին ասուլիսի ժամանակ ասաց ջոկատի հրամանատար Ռաֆայել Քոչարյանը:

Նա նշեց, որ իրենց ջոկատը ստեղծման օրից անցել է կռիվների միջով և ունեցել փայլուն հաջողություններ:

«Երբ մենք մեր ջոկատով մտել ենք մարտի դաշտ, այսպես կոչված, «Յաշմա» ջոկատը միշտ դիմել է փախուստի, նապաստակի նման դեմներս վազելիս է եղել: Մեզ հրավիրել են Ջերմուկ, որպեսզի տեղի զորամասի հետ անցկացնենք ծառայություն: Մենք հայտարարել ենք, որ նրանց կաջակցենք: Ես սա մի քանի օրվա բան եմ պատմում: Ինչ-որ նոր օրենք է դուրս եկել, որ ինչ-որ առանց աշխարհազորայինի պայմանագրի ոչ ոք չի կարող դիրք բարձրանալ: Ու ինձ զանգարահել, ասել են, որ 5-րդ կորպուսի հրամանատար Բադասյանը ցանկանում է ինձ հետ ծանոթանալ: Ես էլ ասել եմ, որ խնդրիր չկա, դրանից հետո գնացել ենք Վայք»,-ասաց Ռաֆայել Քոչարյանը:

Նա նաև հիշատակեց, որ երբ դրանից հետո ինքը փորձել է կապ հաստատել հրամանատար Բադասյանի հետ, նա ասել է, որ ժամանակ չունի նրա հետ հանդիպելու և ցանկություն չունի, որ նրանց զորքերը դիրքեր բարձրանան:

«Ինձ ասում է՝ գնացեք, ձեր Իջևանը պահեք: Նախ ասեմ, որ մեր Իջևանն այսօր պահվում է, ու 38 տարի թուրքը չի կարողացել ոտք դնի այնտեղ: Ու ինձ համար տարբերություն չկա՝ Ջերմո՞ւկն եմ պահում, թե՞ Իջևանը: Բոլորն էլ իմ հայրենիքն է ու ինձ համար ոչ մի տարբերություն չկա: Մենք փորձել ենք կապնվել նախարարի հետ, որպեսզի այս հարցը պարզաբանենք, սակայան այնտեղից պատասխան ենք ստացել, որ անհնար է նախարարին տեսնելը» ,-ասաց հրամանատարը՝ ընդգծելով, որ մամուլի ասուլիսը խնդրի մասին բարձրաձայնելու իրենց վերջին տարբերակն է: