Ադրբեջանը ևս խնդիրներ ունի և Արցախից կախվածության մեջ է․ Նաիրի Հոխիկյան

Սարսանգի ջրամբարն Արցախի խոշորագույն արհեստական ջրամբարն է, լցված ժամանակ պարունակում է 511 մլն խմ ջուր։ Այն ջրով է ապահովում ոչ միայն Արցախին, այլև Ադրբեջանի արևելյան շրջաններին՝ գյուղատնտեսական նպատակներով, ինչպես նաև էլեկտրաէներգիայի արտադրության համար։ Այս մասին այսօր Հայելի ակումբում ասաց մեդիափորձագետ Նաիրի Հոխիկյանը։ 

Նրա խոսքով՝ արգելելով Հայաստանից Արցախ գնացող էլեկտրականության մուտքը՝ Ադրբեջանը ստեղծեց պայմաններ, որպեսզի Սարսանգի ջրամբարի վրայի ՀէԿ-ն ավելի ծանրաբեռնված աշխատի։

«Այդ պարագայում, բնակաբանար, Սարսանգի ջուրը պիտի սկսի նվազել։ Այն, որ Սարսանգի ջրամբարի ջուրը նվազելով՝ մի օր հասնելու է կրիտիկական մակարդակի, միայն Արցախի խնդիրը չէ, դա իր վտանգավոր հետևանքներն է բերում նաև Ադրբեջանին։ Որովհետև Սարսանգի ջրամբարից Թարթառ գետով ջուրը հասնում է Մատաղիսի ջրամբար, որն այժմ Ադրբեջանի վերահսկողության տակ է, այնտեղից էլ գնում է Գանձակի տարածաշրջան, որտեղ բազմաթիվ բնակավայրերն են ստանում այդ կենսական անհրաժեշտության ջուրը»,- ասաց Հոխիկյանը։ 

Փորձագետը հարց ուղղեց, թե այդ դեպքում ի՞նչ է անում Ադրբեջանը և ինքն էլ պատասխանեց այդ հարցին․ «Ադրբեջանը փորձում է զոհաբերել իր արևելյան շրջանների բնակիչներին, այսինքն՝ երաշտի հասցնել, որովհետև դա միակ քաղցրահամ ջրային ռեսուրսն է։ Ստացվում է, որ Ադրբեջանի արևելյան շրջանների բնակիչներն Ալիևի պատճառով կանգնում են բնապահպանական, նաև գյուղատնտեսական հումանիտար աղետի առաջ։ Արցախի Հանրապետությունը բազմիցս զգուշացրել է, որ եթե իրենք փակ են փակում ճանապարհը, գումարած թույլ չեն տալիս, որ Հայաստանից էլէներգիայի գծերը մտնեն Արցախ, ապա իրենք ստիպած են լինելու ավելի մեծ ռեսուրսներ ծախսել Սարսանգի ջրամբարից, որպեսզի արցախցիներն ունենան էլեկտրականություն։ Սրանից հետևում է, որ Ադրբեջանը ևս խնդիր ունի և մեզնից կախվածության մեջ է։ Եվ քանի որ Ադրբեջանը՝ Ալիևի մակարդակով, թքած ունի իր հանրության ժողովրդի վրա, և եթե ընդառաջ քայլ չեն արել, մեզ այլ բան չէր մնում անել, քան փակել Սարսանգի ջրամբարը, որպեսզի ջուրը կարողանանք արդյունավետ օգտագործել»,- ասաց Հոխիկյանը։