Հովիկ Աբրահամյանի աչքը Երևանի քաղաքապետի պաշտոնին է

Մխչյանում ծնված, մեծացած, հայրենի եզերքի նիստ ու կացով ապրած ու կրթված Արգամի որդի Հովիկի մտքով անգամ երբևէ անցած չէր լինի, թե կգա մի օր, որ ինքը ոչ ավել, ոչ պակաս՝ Հայաստանի Հանրապետության վարչապետ կդառնա։

Չնայած՝ մարդիկ կարծես թե ադեն համակերպվել են թե նրա վարած անհաջող տնտեսական քաղաքականությանը, թե Մոնումենտում կառուցած թագավորական ապարանքի աչք մտնող գոյությանը, թե Արտաշատն ու հարակից տարածքներն իր և ազգակիցների ձեռքում պահելու իրավիճակին։

Սակայն, պարզվում է, մխչանցի վարչապետի համար քիչ է ձեռք բերածը։ Ու հիմա Արգամի որդի Հովիկը ուզում է, որ հայրենի Մխչյանում ծնված, բայց հոր հնարավորություններն ու կապերը վայելած Հովիկի որդի Արգամը դուրս գա պապական կալվածքների սահմաններից և իրենով անի Երևանը։

Վերջին շրջանում առավել հաճախ է լրատվամիջոցներով շրջանառվում Արգամ Աբրահամյանի՝ Երևանի քաղաքապետ դառնալու հնարավոր հանգամանքը։ Իհարկե, այս ամենը կարելի է նաև թերահավատորեն ու քմծիծաղով ընդունել։ Բայց, քանի որ մեր երկրում ականատեսն ենք լինում ամենաանարժանահավատ ու անհնարին թվացող զարգացումների, ու եթե նաև հաշվի առնենք մեր պապերի իմաստուն այն խոսքը, թե՝ ծուխն առանց կրակի չի լինում, պետք է սպասել նաև նման զարգացումների։

Երևանի քաղաքապետ Տարոն Մարգարյանին նույնիսկ լրագրողները հարցրել են, արդյոք հնարավոր է, որ իրեն փոխարինի Հովիկ Աբրահամյանի որդին: Տարոն Մարգարյանը մեջ բերել է Երևանի ավագանու մասին օրենքը, իսկ օրենքը թույլ է տալիս, որ 30 տարին լրացած ցանկացած ոք մասնակցի ընտրություններին, ինչու չէ նաև զբաղեցնի քաղաքապետի պաշտոնը: