Ասֆալտ փռող ինչ-որ մեկը, որոշել է պանրի գործ անել. Արմեն Գրիգորյան

Արդեն մի քանի օր է Ֆեյսբուք սոցիալական ցանցում տեղադրված է պանրանման զանգված` պատրաստված է Հայաստանում անվանումով, պանրի կտոր հիշեցնող լուսանկարը, որը օգտատերերի կողմից դարձել է քննարկումների առարկա:

Նշվում է, որ ռուսները դժգոհում են, թե Ռուսաստանի պատժամիջոցների ֆոնին  իրենք պանիր չեն ուտում, այլ ինչ-որ կասկածելի ծագում ունեցող պանրանման զանգված:

Newspress.am-ին այս խնդրով պարզաբանումներ տվեց Հայաստանի պանրագործների միության նախագահ Արմեն Գրիգոյանը:

Նա չի հավատում ֆեյսբուքյան լուսնակարին, և նշում է, որ ոչ ոք չի կարող վստահաբար ասել, թե նկարում երևացող պանրի կտորն իրոք պատրաստված է Հայաստանում կամ հայկական ծագում ունի: Բացի այդ, պանրագործության ոլորտում պանրանման տերմին չկա:

Պանրագործների միության նախագահը հիշեցրեց, որ Ռուսաստանում տնտեսական վիճակն այնքան էլ բարվոք չէ, և չի բացառվում, որ ինչ-որ, թեկուզ, ասֆալտ փռող մեկը, որոշել է պանրի գործ անել, և այն ինչ կարողանում է պատրաստել, նման անվանումով հանձնում է ռուսական խանութներին:

«Դա Հայաստանի հետ կապելը սխալ է, այստեղ դիտավորություն կա. քաղաքական նպատակներով վարկաբեկել մի ամբողջ երկիր»,- շեշտեց Ա. Գիգորյանը, չբացառելով, որ այսկերպ Ռուսաստանին ցույց են տալիս, թե իրենք հրաժարվեցինք լավագույն պանիրներից և ահա թե ինչով են սնվում, այլ կերպ ասած` դեմ են ՌԴ այս ոլորտի քաղաքականությանը:

Ինչ վերաբերում է Հայաստանից արտահանվող պանրի որակին, ապա Ա. Գիգոյանը շեշտեց, որ Հայաստանը պանրագործության ոլորտում առաջատար է և միանշանակ արտահանում է որակյալ պանիր, այլ խնդիր է, որ Հայաստանը չի կարողանում քանակ ապահովել:

Նա նաև նշեց, որ Հայաստանից արտահանվում է պանրի հումք, որն ուղարկվում է ուղիղ ռուսական վերամշակողներին, որտեղ և վերածվում է հալած պանրի, իսկ թե այս հումքը կարող էր հայտնվել խանութներում, Ա. Գիգոյանը ժխտեց, քանի որ այս հումքը չոր է, յուղազրկված և անմիջական օգտագործման համար անհարմար:

Նաև Արմեն Գիգոյանի համար հետաքրքիր է, թե որն է այդ լուսանկարի աղբյուրը, ինչը համընկավ Հայաստանում դաբաղ հիվանդության խնդրի հետ, որին հետևեց ՌԴ-ի կողմից մսամթերքի և կաթնամթերքի ներկրման արգելքին:

«Այստեղ կարելի է միտում տեսնել, որպես կանոն, նման զուգադիպությունները պատահական չեն լինում»,- կարծիք հայտնեց պանրագործների միության նախագահը: