«Հոկտեմբերի 27»-ի և «Մարտի 1»-ի գործերի վերաբերյալ բովանդակային առումով հանրությանն ասելիք չունենք. Գլխավոր դատախազ (տեսանյութ)

«Մարտի 1»-ի գործը կազմված է 800 հատորից, գտնվում է մեկ քննիչի վարույթում, ամեն շաբաթ առնվազն մեկ անգամ զեկուցվում է իր մոտ, քննարկվում է, ըստ ժամկետների հրատապության այդ դրվագները քննարկվում են։ Այս մասին Ազգային ժողովում հայտարարեց գլխավոր դատախազ Աննա Վարդապետյանը:

Նա նշեց, որ 2023 հաղորդման մեջ 800 հատորի վերաբերյալ ոչ ամբողջությամբ, բայց առանձին դրվագների վերաբերյալ հաշվետվություն ներկայացրած կլինեն։ Ինչ վերաբերում է «Հոկտեմբերի 27»-ի գործին, ապա դատախազն ընդգծեց, որ ուղղակի ֆիզիկապես այդ վարույթին չի հասցրել անդրադառնալ։

««Հոկտեմբերի 27»-ի և «մարտի 1»-ի գործերի վերաբերյալ դատախազության 2022 թվականի գործունեության մասին հաղորդման նախագծում ներառված են եղել, բայց իմ կողմից դրանք վերջնական տարբերակում չեն ներառվել, քանի որ, իմ գնահատմամբ, մենք բովանդակային առումով Ազգային ժողովին և հասարակությանը, ցավոք, դեռ ասելիք չունեինք»,- ասաց Վարդապետյանը՝ հավելելով, որ երկու վարույթներով էլ որոշակի քննչական գործողություններ կատարվում են։

Նա նաև նշեց, որ հիշյալ 25 գործից իր համար ամենառաջնայինը «Մարտի 1»- գործն էր՝ հաշվի առնելով ժամկետների առկայությունը։

«Կարծում եմ՝ տարվա երկրորդ կեսում «Հոկտեմբերի 27»-ի վերաբերյալ կհասցնենք այս ձևաչափով անդրադառնալ»,- ասաց նա։