Երևան-Սևան ճանապարհի սարերը մեր աչքի առաջ անհետանում են, էս նորմա՞լ է. Նազարյանը՝ Սիմիդյանին

Օրենքների ընդունումը կարևոր է, բայց ես ուզում եմ անդրադառնալ մի խնդրի: Օրենքն ընդունվում է, խնդիրները դրվում են, բայց դրանք մնում են: Ուզում եմ հասկանալ՝ դրանց լուծում կա՞, թե՞ ոչ: Այս մասին Ազգային ժողովում ասաց «Հայաստան» խմբակցության պատգամավոր Գեղամ Նազարյանը՝ հարց հղելով Շրջակա միջավայրի նախարար Հակոբ Սիմիդյանին: 

Նրա խոսքով՝ մեր աչքի առաջ ամեն օր Երևան-Սևան ճանապարհից սարեր, բլուրներ են անհետանում: Եվ այս ամենը բառի բուն իմաստով. ամբողջ լանդշաֆտը փոխվում է:

«Դա չի՞ ազդում արդյոք Արարատյան դաշտի, Արագածոտնի գյուղերի ու գյուղատնտեսությունների վրա, չի՞ ազդում արդյոք քամիների ուղղության վրա: Ի վերջո դարերով այդ բլուրներն ու սարերը եղել են: Եվ հանկարծ մեծ արագությամբ անհետանում են: Երևանն էլ փոշու մեջ է: Մեր բնակիչները միամտաբար կարծում են, որ այս ամենը կապված է շինարարության ծավալների հետ: Իրականում Երևան մտնող քամու հիմնական ուղղությունը հյուսիսային է: Եվ այդ ավազի բաց հանքերից ամբողջ ավազը բերում և թափվում է Երևանի վրա: Այս հարցերի մասին Կառավարությունը կամ նախարարությունը մտածո՞ւմ է, թե՞ նորմալ է՝ վերցնել սարերը և վերացնել: Վաղը մյուս օրն էլ տեխնիկան թույլ կտա, ասենք, կարող են անցնել Արագած սարին՝ քարերը, բազալտները հանել: Սա նորմա՞լ է: Թույլատրելիի սահմաններո՞ւմ է: Ինչ-որ մեկը փորձաքննություն արե՞լ է, պարզե՞լ է»,- հարցրեց Նազարյանը: