Ադրբեջանցիներն այս տեսանյութ ներկայացնելու են այսօր Վաշինգտոնում ընթացող բանակցություններում՝ իբրև ապացույց, որ հայերի համար Լաչինի միջանցքը ազատ է․ Արման Աբովյան

Տեսանյութը, թե ինչպես են թուրք-ադրբեջանական ահաբեկչական ուժերը ստիպում 4 արցախցիներին փաստաթղթեր ներկայացնել Արցախի Հանրապետության օկուպացված Բերձորի շրջան մուտք գործելիս, առաջին հերթին հոգեբանական ճնշման հաշվարկ ունի։ Այս մասին գրում է նախկին պատգամավոր, քաղաքագետ Արման Աբովյանը։ 

Անշուշտ, նման գործողությունները շարունակվելու են և նման գործողությունների նպատակը մեկն է՝ հայ հասարակության մեջ հուսահատության զգացում սերմանել և մեր աչքերում օրինականացնել Արցախյան տարածքների օկուպացիան։ Ադրբեջանցիներն այս տեսանյութը միանշանակ ներկայացնելու են այսօր Վաշինգտոնում ընթացող բանակցություններում՝ իբրև ապացույց, որ հայերի համար Լաչինի միջանցքը ազատ է և պետք է միայն «անձնագրային հսկողություն» անցնել, և իբրև թե շրջափակում չկա, որն իրականում լկտի սուտ է: 

Հերթական անգամ ռուս խաղաղապահներին կրիտիկական դրության մեջ դնել և ցույց տալ, որ խաղաղապահներ պետք չեն։ Անշուշտ, խաղաղապահները պետք է հասկանան, որ որքան շատ են նման միջադեպերը, այնքան ավելի է խարխլվում վստահությունը նրանց նկատմամբ՝ որպես կառույցի, որը կարող է անվտանգության երաշխավորի դեր խաղալ արցախցիների համար։ Բայց դրա հետ մեկտեղ պետք է հասկանալ, որ թուրք-ադրբեջանական օկուպացիոն ուժերի սանձարձակ պահվածքի պատասխանատվությունը կրում է ներկայիս հայկական իշխանությունը, որը, ճանաչելով Ադրբեջանի, այսպես կոչված, տարածքային ամբողջականությունը, առանց Արցախի կարգավիճակի վերաբերյալ վերապահումների, փաստացի տալիս է իր համաձայնությունը՝ օրինականացնելու Արցախի Հանրապետության տարածքների օկուպացիայի փաստը։ 

Այսինքն ՝ ունենք մի իրավիճակ, երբ փաշինյանական իշխանությունների բանավոր պահանջը ուղղված «Ադրբեջանին, միջազգային հանրությանը և ռուս խաղաղապահներին»՝ հեռացնել Բերձորի շրջանում տեղադրված ադրբեջանական անցագրային կետը, ուղղակի հակասության մեջ է մտնում Ադրբեջանի տարածքային ամբողջականությունը ճանաչելու (առանց Արցախի ինքնորոշման մասին գեթ մեկ ակնարկի) մասին հայկական կողմի հայտարարության հետ։ Հիմա ադրբեջանցիները փորձելու են տեղեկատվական ճնշումն ամրագրել, բայց միանգամից ուզում եմ վերապահում անել, որ մեծ հաշվով դա չի փոխում շրջափակման փաստը։ Չզարմանաք, եթե նման կետեր շուտով հայտնվեն նաև Հայաստանի Հանրապետության օկուպացված տարածքներում՝ օկուպացիայի հետագա առաջխաղացմամբ դեպի Հայաստանի խորքը։ 

Արցախն՝ առանց Սյունիքի, Տավուշի և Գեղարքունիքի, ադրբեջանցիներին պետք չէ և սա ադրբեջանական պետական տեսլականն է։ Պետք է ազնվորեն ընդունել, որ հենց հայկական իշխանությունն է անմիջական պատասխանատվություն կրում Արցախի և Հայաստանի տարածքների օկուպացիայի լեգետիմացիայի համար։ Եվ հիմա պետք չէ կրկին պատասխանատվությունը բարդել այս կամ այն կողմի վրա։ Եթե դուք սկզբունքորեն հրաժարվում եք զենքի ուժով պաշտպանել ձեր տարածքը, ապա ձեր գյուղը, քաղաքը, տունը անպայման գրավելու են: Այնպես որ, հերիք է մեղադրել շուրջ բոլորին։ Մեղավոր են առաջին հերթին նրանք, ովքեր մարդասպանների ու օկուպանտների հետ «խաղաղության դարաշրջանի» կարգախոսներով կտոր-կտոր են անում Արցախն ու Հայաստանը։