ՄԻՊ-ը ստատուս գրող և օրվա իրադարձությունների մասին հայտարարություն անող սուբյեկտ չէ․ Մանասյան (տեսանյութ)

Մարդու իրավունքների պաշտպան Անահիտ Մանասյանը հստակ չցանկացավ գնահատական տալ «Նիկոլ, դավաճան» գոռացող քաղաքացու արարքին։ 

Լրագրողների հետ զրույցում նա նշեց, որ Մարդու իրավունքների պաշտպանը ոչ թե ստատուս գրող և օրվա իրադարձությունների մասին հայտարարություն անող սուբյեկտ է, այլ կոնկրետ իրավունքների խախտումների առկայությունը կամ բացակությունն արձանագրող, երբ գործն անհատական բողոքների։ 

«Կոնկրետ գործերի հետ կապված գնահատականներ տալը ենթադրում է դրան նախորդող օրենքով սահմանված գործընթացներ։ Օրենքն է արգելում իրավունքի խախտման առկայության կամ բացակայության վերաբերյալ որեւէ գնահատական տալ, քանի դեռ այդ պրոցեսները չեն եղել։ Եթե կան անհատական գործեր, որոնք մեր մանդատի շրջանակում են, վստահաբար գնահատականներ լինելու են, սակայն այս գործընթացներն անցնելուց հետո»,- նշեց Մանասյանը։

Լրագրողների հարցին, թե «ստատուս գրող» ասելով արդյոք Մանասյանը նկատի ունե՞ր նախկին ՄԻՊ Արման Թաթոյանին՝ վերջինս բացասական պատասխանեց։

«Ես, բնականաբար, ոչ պարոն Թաթոյանին, ոչ էլ այլ պաշտպանի մասին գնահատական չեմ տվել։ Ես նշեցի իմ գործունեության հիմնական սկզբունքները»,- ասաց Մանասյանը։

Անահիտ Մանասյանի խոսքով՝ քաղաքացին, որին աշխատանքից ազատել են Նիկոլ Փաշինյանին «դավաճան» անվանելու համար, կարող է դիմել Պաշտպանի գրասենյակ, ինչից հետո քննություն կսկսվի։