Բանակում կան սպանություններ, որոնք ինքնասպանություններ են որակվում. Էդգար Խաչատրյան

Բոլոր զորամասերում սպանության քրեական գործերը իմ ձեռքի տակով են անցնում. անօրինականությունն ակնհայտ է: Այս մասին newspress.am-ի թղթակցի հետ զրույցում ասաց իրավապաշտպան Ռուբեն Մարտիրոսյանը: Նա վստահեցնում է, որ իր ձեռքի տակով անցած ցանկացած սպանության գործով վկա զինվորների մեծ մասը զորացրվելուց հետո փախչում է Հայաստանից` հավելելով, որ բանակում իշխում է վախի մթնոլորտը:

Փաստաբանը նկատում է, որ վերջին հինգամյակում չի եղել մի դեպք, երբ սպանությունը որպես ինքնասպանություն ներկայացրած չլինեն ու, որ ամենակարևորն է` չկա մի պետական մարմին, որ շահագրգռված լինի սպանությունների բացահայտման գործում:

«Որպեսզի իրականը բացահայտվի, պետք է սկսել դիահերձարանից»,- ասաց Ռուբեն Մարտիրոսյանը:

Նա վստահ է` բոլոր սպանությունները նենգափոխում, դարձնում են ինքնասպանություն կամ հիվանդությունից մահ:

«Այս պարագայում մենք ստանում ենք իդեալական բանակի մոդել, ինչը որ ցանկանում ենք ցույց տալ», -ասում է իրավապաշտպանը:

Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցի դիտարկմամբ էլ պետք է հատկապես ուշադրություն դարձնել զինծառայողի անվտանգությանը, եւ ամեն ինչը չդիտարկել հակառակորդի կողմից սահմանախախատման կամ դիվերսիայի արդյունքում սպանության դեպք:

«Սահմանախախատման դեպքերը այլ են, իհարկե, դրանցից էլ պետք է պաշտպանվել, բայց սպանություններ կան, որ ինքնասպություններ են որակված, երբ կրակոց կա ոտքի կրունկին, սրունքին, ոնց կարող է նման բան լինել: Սրանք պետք է բացահայտել», -մեզ հետ զրույցում ասաց «Խաղաղության երկխոսության» ՀԿ ղեկավար Էդգար Խաչատրյանը:

ՀՔԱ Վանաձորի գրասենյակը բազմիցս առաջարկել է ՀՀ Զու-ում օմբուդսմեն ունենալ, սակայն այս հարցը չի քննարկվել: Նկատենք, որ Վանաձորի Հելսինկյան գրասենյակը եւ «Խաղաղության Երկխոսություն» ՀԿ-ն մշտադիտարկում է անցկացնում եւ ուսումնասիրում յուրաքանչյուր տարի ՀՀ ԶՈՒ-ում մահվան ելքով դեպքերը: ՀԿ-ների տվյալներով 2015թ-ին 77 մահվան դեպք է գրանցվել, անցած տարվա 46-ի փոխարեն: Դրանցից 32-ը տեղի է ունեցել ՀՀ, 45-ը՝ ԼՂՀ տարածքում։ 41 զինծառայող մահացել է հրադադարի ռեժիմի խախտման հետևանքով (7՝ ՀՀ, 34՝ ԼՂՀ տարածքում):