Թովմասյանը նամակներ է հղել միջազգային կառույցներին․ պետք է քրեական պատասխանատվության ենթարկվեն (տեսանյութ)

ԱԺ անկախ պատգամավոր Թագուհի Թովմասյանը երեկ` ապրիլի 20-ին խորհրդարանում տեղի ունեցածը խայտառակություն է որակում։

Նրա խոսքով` կարող են իրեն հակադարձել, որ շատ խորհրդարանում նման բաներ տեղի են ունենում, սակայն որևէ տեղ չեք տեսնի, որ ընդմիջման ժամին անվտանգության աշխատակիցները քաշքշեն պատգամավորներին։

«Ես ուզում եմ հայտարարել, որ ԱԺ նախագահի հրամանն ապօրինի էր՝ մեզ դահլիճից դուրս հրավիրելու վերաբերյալ, երբ հենց ինքը հայտարարեց ընդմիջում, և երկրորդ՝ ԱԺ նախագահի հրամանը կատարողները իրավունք չունեին որևէ կերպ խոչընդոտել պատգամավորների աշխատանքը։ Նրանք պարտավոր են չեզոքացնել վտանգը, մինչդեռ մենք ուղղակի կանգնած էինք, որևէ մեկի անվտանգությանը չէինք սպառնում։ Ստացվում է, որ մենք բախվել ենք շատ կոշտ ապօրինության, և դա պետք է հետևանքներ ունենա»,-ասաց նա ՀՀԿ-ի գրասենյակում հրավիրված ասուլիսի ժամանակ։

Նրա խոսքով, ինքը դիմում է ուղարկելու բոլոր ուժային կառույցներին, որպեսզի քրեական պատասխանատվություն կրեն բոլոր այն մարդիկ, ովքեր թույլ են տվել ապօրինություններ։

«Մենք չենք կարող թույլ տալ, որ «Քաղաքացիական պայմանագիր» խմբակցությունը, որը ԱԺ-ն փորձում է դարձնել իր սեփական օբյեկտը, անընդհատ անի այն, ինչ ուզում են։ Նման բան չի կարող լինել։ Չեն կարող այդպես շարունակել, քանի որ ինչպես հայտարարեցի, սպառել են իրենց ստելու լիմիտը»,- նշեց նա։

Թովմասյանի խոսքով` ինքը չի պատրաստվում արձագանքել երեկ ԱԺ-ում հնչած հայտարարություններին, բայց զգուշացրեց.

«Եթե Նիկոլ Փաշինյանը շարունակի սուտ խոսել, ապա այն ստանալու է համարժեք պատասխան։ Մենք այլևս չենք թողնելու, որ նա ստեր հնչեցնի ԱԺ ամբիոնից»։