Դու իմ համար հանրություն չես. Եռաբլուրում Կճոյանը խոսել է «Օֆշորի գործի» մասին

Բանակի օրվա առթիվ Եռաբլուր այցելած Նավասարդ Կճոյանը լրագրողների հետ զրույցում նշել է, որ ինքը «Օֆշորի գործի» հետ բացարձակ առնչություն չունի: Լրագրողի դիտարկմանը, թե քրեական գործում ի սկզբանե հենց նրա անունն է շոշափվում, Կճոյանը նշեց. «Ով շոշափում է, թող նա էլ բացատրի»:

Հիշեցնենք, որ «Օֆշորի գործով» տուժող ճանաչված, ունեզրկված գործարար Փայլակ Հայրապետյանը պնդում է, որ իրեն պատկանող մոտ 100 միլիոն ԱՄՆ դոլարի անշարժ գույքը 2009թ. գրավ է դրել «Ամերիաբանկում», որն այն գնահատել է 33 միլիոն դոլար եւ դրա դիմաց գործարար Աշոտ Սուքիասյանին հատկացրել 10.7 միլիոն դոլար: Վերջինը, պայմանավորվածության համաձայն, այդ գումարը Աֆրիկայում ոսկու և ալմաստի արդյունահանման մեջ ներդնելու փոխարեն, փոխանցել է կիպրոսյան օֆշորային մի քանի ընկերությունների, այդ թվում՝ Wlispera Holdings Limited-ին, իսկ Փայլակ Հայրապետյանը զրկվել է ունեցվածքից: Փայլակ Հայրապետյանը գործի առանցքում Նավասարդ Կճոյանի անունն է պարբերաբար հնչեցնում:

Նավասարդ Կճոյանը լրագրողներին քիչ հասանելի մարդկանցից մեկն է ու հենց դրա համար լրագրողները Եռաբլուրում փորձեցին Կճոյանից լսել, թե «Օֆշորի գործի» հետ կապված ինչ ունի ասելու հանրությանը: Չնայած Կճոյանը հորդորեց բարի լինել իր հանդեպ, բայց ինքը բավականին ագրեսիվ էր` «դու իմ համար հանրություն չես, ձանձրացրեցիք»:

Ի վերջո, ի՞նչ եղավ Կճոյանի «Բենթլին»: Պարզվում է նվեր ստացած «Բենթլին» Կճոյանը վաղուց նվիրել է: