Մնացել է ախրանիկների ինստիտուտը, որ Փաշինյանին պահում է իշխանության․ ինքը դա պահում է ոնց կարող է՝ փողով, վախով, ամեն ինչով, ինչ ուզում են, տալիս է․ Աննա Մկրտչյան

Իմ կարծիքն այստեղ երկրորդական է, ավելի լավ է՝ մենք միջազգային կառույցների հրապարակած թվերին հավատանք, թե ինչքան պատմական անկում է ապրել ՀՀ-ում երբևէ եղած իշխանության վարկանիշը։ Այս մասին այսօր Ազգային ժողովում լրագրողների հետ զրույցում ասաց ԱԺ «Պատիվ ունեմ» խմբակցության պատգամավոր Աննա Մկրտչյանը՝ պատախանելով հարցին, թե համաձա՞յն է Փաշինյանի այն պնդմանը, թե ՀՀ քաղաքացիները հավատում են, որ ապագա կա։ 

«Այս մարդիկ հայտարարում են՝ թուրքի ու ադրբեջանցու հետ միայն բարեկամություն, ոչինչ, որ 4 օրվա մեջ 4 հայի կյանք են խլում, ոչինչ, որ անհասկանալի պայմաններում շարունակում են ՀՀ տարածքային ամբողջականության դեմ ուղղված գործողությունները, ուղղակի, ինչպես իրենց ուսապարկերն են ասում, իրենք հանձնում են այդ տարածքներն իրենց կամքով, առանց դիմադրության։ Իսկ Հայաստանի քաղաքացիների 95 տոկոսից ավելին՝ 98 տոկոսը, պնդում է, որ Ադրբեջանը մեր թշնամին է, մենք Արցախն Ադրբեջանի կազմում չենք թողնում և սա ուղղակի հակասություն է նրա, թե ով է այսօր այստեղ կանգնած և ինչ են մտածում իր մասին Հայաստանի քաղաքացիները։ Այն սիստեմատիկ ստերը, որն այստեղից պարբերաբար հնչում են, նորություն չեն և մեզ չեն զարմացնում»,- ասաց Մկրտչյանը։

Նա մասնավորեցրեց իր խոսքը՝ բերելով իշխանություննների կողմից հայտարարվող «աննախադեպ» ձեռքբերումների մասին, և խոսեց անկանխիկի մասին հայտարարություններից։

«Ասում է՝ Հայաստանում աննախադեպ աճել են անկանխիկ գնումները, ասում ես՝ լսիր, մի քանի ամիս առաջ բերել էիք, որ կանխիկ գնումներն արգելում եք, բնական է, որ բոլոր կանխիկները դարձել են անկանխիկ, հիմա եղավ, որ աճե՞լ են Հայաստանում անկանխիկ գնումները, տնտեսությո՞ւն է աճել։ Էս մարդկանց ասում ես՝ ի՞նչ 29․800 քկմ, դու կարո՞ղ է խոսես Արցախի ինքնորոշման իրավունքից, կարող է ասես՝ Տեղ գյուղում ի՞նչ կատարվեց, կարո՞ղ է խոսես Եռաբլուրում զոհված զինծառայողների ծնողներին՝ հայ կանանց, բռնության ենթարկած, տարբեր գույնի բերետներ հագնող կենդանիներին ի՞նչ ես անում։ Այս առարկայական խոսույթն այստեղ բացակայում է ու բացակայելու է միշտ, քանի որ այս երկրում մնացել է մի ինստիտուտ, որն իրեն պահում է իշխանության՝ ախրանիկների ինստիտուտը։ Ինքը դա պահում է ոնց կարող է՝ փողով, վախով, ամեն ինչով, ինչ ուզում են, տալիս է։ Ինքը երբեք չի հայտարարի, որ Հայաստանի քաղաքացիներից որևէ մեկը չպիտի մտածի իր երեխային հիվանդանոց տանելուց առողջապահական խնդիրներ ունենալու դեպքում, որ որևէ պրոբլեմ չպիտի ունենա, բայց երեկ ասել է, որ ոստիկանը, մասնավորապես՝ կարմիր բերետավորները, երբեք չպիտի այդ խնդիրն ունենան։ Ես ավելի բացեմ՝ ինքն ասում է, որ ախրանիկները, կարմիր բերետավորները ոչ մի բանի պրոբլեմ չպիտի ունենան, որովհետև եթե նրանք պրոբլեմ ունեցան, դա իր պրոբլեմն է լինելու»,- ընդգծեց պատգամավորը։