Պաշտոնյաներին տրվող նվերները կօտարվեն աճուրդով կամ նվիրաբերությամբ. «Փաստ»

«Փաստ» օրաթերթը գրում է.

«Արդարադատության նախարարությունն առաջարկում է լրացումներ և փոփոխություն կատարել «Պետական գույքի կառավարման մասին», «Տեղական ինքնակառավարման մասին» և «Հանրային ծառայության մասին» օրենքներում: «Հանրային ծառայության մասին» օրենքի 29-րդ հոդվածի 6-րդ և 9-րդ մասերով սահմանված դեպքերում հանրային ծառայողների և հանրային պաշտոն զբաղեցնող անձանց հանձնված նվերները դառնում են պետական կամ համայնքային սեփականություն: Մասնավորաբար, եթե նվերներն իրենց արժողությամբ գերազանցում են վաթսուն հազար դրամը, ապա դրանք համարվում են պետական կամ համայնքային սեփականություն:

Հանրային պաշտոն զբաղեցնող անձինք և հանրային ծառայողները պարտավոր են սահմանված կարգով դրանք հանձնել պետությանը կամ համայնքին: Գործող օրենսդրությունը, սակայն, պետական կամ համայնքային սեփականություն դարձած նվերների տնօրինման հետ կապված առանձնահատուկ կարգավորումներ չի նախատեսում և սահմանափակվում է միայն սահմանելով, որ օրենքի 29-րդ հոդվածի 6-րդ մասում նշված գույքը տնօրինվում է «Պետական գույքի կառավարման մասին» օրենքով կամ տեղական ինքնակառավարման մասին օրենսդրությամբ սահմանված կարգով։ Նույն հոդվածի 9-րդ մասի հիմքով պետության կամ համայնքի սեփականություն դարձող գույքի տնօրինման առնչությամբ առկա չէ նաև այս կարգավորումը:

Այս համատեքստում չեն բացառվում իրավիճակներ, երբ պետությունը կամ համայնքը, դառնալով գույքի սեփականատեր, չօգտագործի իրեն անցած գույքը և չիրականացնի դրա օտարմանն ուղղված որևէ գործողություն՝ հաշվի առնելով այն հանգամանքը, որ հանրային իշխանության համապատասխան մարմինն այդ գույքն օտարելու կամ որևէ կոնկրետ եղանակով կամ կոնկրետ ժամկետում օտարելու պարտականություն չունի: Մյուս կողմից` այդ գույքերը հաճախ իրենց նպատակային նշանակությամբ ու բնույթով այնպիսինն են, որ օբյեկտիվորեն չեն կարող օգտագործվել պետական կառավարման կամ համայնքային իշխանության մարմինների կողմից՝ իրենց լիազորությունների իրականացման համար: Հենց այս պատճառով անհրաժեշտ է սահմանել նշված խումբ նվերների հետագա օտարման պահանջ՝ կարգավորելով նաև օտարման եղանակները, հատուցմամբ օտարման դեպքում օտարման արդյունքում ստացված դրամական միջոցների տնօրինման կարգը:

Նախագծով առաջարկվում է սահմանել հանրային ծառայողի կողմից ստացված և պետական կամ համայնքային սեփականություն դարձած գույքի տնօրինման հետ կապված կարգավորումներ՝ նախատեսելով նշված գույքերը հրապարակային սակարկություններով իրացնելու կամ դրանք նվիրաբերության եղանակով օտարելու վերաբերյալ կարգավորումներ: Առաջարկվում է նաև սահմանել, որ նշված գույքն իր նպատակային նշանակությունից ելնելով նվիրաբերելու հնարավորության դեպքում այն նվիրաբերվում է բարեգործություն իրականացնող ֆիզիկական կամ իրավաբանական անձանց, իսկ այն հրապարակային սակարկություններով իրացնելու արդյունքում ստացված հասույթն ուղղվում է ՀՀ պետական բյուջե՝ «Բարեգործության մասին» օրենքով սահմանված կարգով ֆիզիկական և իրավաբանական անձանց կողմից իրականացվող բարեգործությանը դրամական աջակցության ապահովման նպատակով»:

Առավել մանրամասն՝ թերթի այսօրվա համարում: