Վլադիմիր Վարդանյանը սադրիչ վերաբերմունք էր ցուցաբերում՝ գոռում էր և նկատողություն էր անում ընդդիմադիր պատգամավորներին․ Մհեր Սահակյանը մանրամասներ հայտնեց դեպքից

Ազգային ժողովի «Հայաստան» խմբակցության պատգամավոր Մհեր Սահակյանը, որին անձեռնմխելիությունից զրկելու միջնորդությամբ Ազգային ժողովում է Գլխավոր դատախազ Աննա Վարդապետյանը, հանդես եկավ ծավալուն ելույթով։

Ներկայացնելով դեպքի մանրամասները, նա նշեց․ «2023թ մարտի 31-ին, ժամը 10։00-ին Պետաիրավական հարցերի մշտական հանձնաժողովում նախատեսված էր աշխատանքային փակ քննարկում։ Քննարկմանը ներկայացել եմ 10-15 րոպե ուշացումով, մոտավորապես 20 րոպե տևել է նախատեսված հարցերի քննարկումը, որից հետո արդեն մեկ այլ թեմանով՝ կապված Հռոմի ստատուտի վավերացման հետ, Արծվիկ Մինասյանի օբյեկտիվ հարցադրմանը, թե արդյոք ստատուսի վավերացումը չի՞ ավելացնի ավելորդ ռիսկեր մեր Հանրապետության համար, իշխանական պատգամավորների կողմից արժանացավ բուռն արձագանքի և անհարկի վիրավորանքների։ Վեճի ընթացքում Վլադիմիր Վարդանյանը մի քանի անգամ դրսևորեց ագրեսիվ վարքագիծ։ Նշեմ, որ վեճի ընթացքում չեմ միջամտել, մինչ այն պահը, երբ ինձ համար ակնհայտ դարձավ, որ Վարդանյանը չարաշահելով իր՝ որպես վարողի լիազորությունները կողմնակալ և սադրիչ վերաբերմունք էր ցուցաբերում, մասնավորապես, գոռում էր և նկատողություն էր անում ընդդիմադիր պատգամավորներին»։ 

Ստոպ-կադրը Սահակյանի ելույթի ընթացքից

Պատգամավորի խոսքով՝ երբ հերթական անգամ վարողը ձեռքը սեղանին է հարվածել, ցանկանալով ընդգծել քննարկումը վարողի և իշխանական պատգամավոր լինելու իր առավելությունները և ցուցադրաբար նայել է իր աչքերի մեջ՝ իր, որ դեռ ոչինչ չէր արտահայտվել, մեղադրանքներ է հնչեցրել, պահանջել լռել։

«Ես նույն տոնայնությամբ ձեռքս հարվածելով սեղանին, ոտքի կանգնելով իմ տեղից՝ պահանջեցի, որպեսզի հարգանք ցուցաբերի ընդդիմադիր պատգամավորների նկատմամբ և կողմնակալ վերաբերմունք չդրսևորի։ Այդ պահին Վլադիմիր Վարդանյանն, ամենայն հավանականությամբ, չհանդուրժելով իմ նկատողությունը, տեղից վեր կանգնելով, բղավելով, որ՝ ում վրա ուզի և երբ ուզի կարող է այստեղ բղավել, մոտեցավ ինձ։ Ես, հաշվի առնեով իր ագրեսիվ պահվածքը և բղավելով արագ ինձ մոտենալը, ուղղվեցի մեկ քայլով և հարված հասցրեցի զուտ ինքնապաշտպանական նկատառումներից ելնելով, որից հետո ցանկություն չունենալով, որ վեճը շարունակվի և ընդլայնվի, անմիջապես հեռացա սենյակից»,- պատմեց պատգամավորը։

Ելույթն ամբողջապես՝ NEWSPRESS.am-ի տեսանյութում