Իսկ որտե՞ղ էին «Պատիվ ունեմ» խմբակցության անդամները

«Հրապարակ» թերթը գրում է.

ԱԺ Մարդու իրավունքների պաշտպանության եւ հանրային հարցերի մշտական հանձնաժողովի նիստում նախօրեին ընդդիմության ՄԻՊ թեկնածու Էդգար Ղազարյանի թեկնածության քննարկումն անցավ, մեղմ ասած, լարված մթնոլորտում։ Նիստին ներկա մոտ երեք տասնյակ ՔՊ-ականները «մարտեր՝ առանց կանոնների» ոճով հարձակվել էին Ղազարյանի վրա ու թույլ չէին տալիս նրան ելույթ ունենալ, ազատ արտահայտվել, սպառնում էին նրա լեզուն կտրել, աչքերը հանել, դուրս վռնդել, վիրավորում էին ու փորձում ծաղրել նրան։ Ընդդիմությունից, սակայն, միայն «Պատիվ ունեմ» խմբակցության անդամ, հանձնաժողովի նախագահ Թագուհի Թովմասյանն էր, ով ի պաշտոնե էր այդտեղ գտնվում՝ նիստը վարելու համար։

Այլ ընդդիմադիրներ ներկա չէին հանձնաժողովի նիստին․ հանձնաժողովի կազմում ընդգրկված «Հայաստան» խմբակցության անդամներից Զեմֆիրա Միրզոեւան ԱՄՆ-ում էր, Արեգնազ Մանուկյանը՝ հիվանդ։ Մյուսների բացակայությունը եթե ինչ-որ առումով հասկանալի էր՝ նրանք չուզելով էին միացել Ղազարյանին ՄԻՊ թեկնածու ներկայացնելու նախաձեռնությանը։ Բացի այդ, նրանք նախորդ օրը հավաքվել էին, քննարկել եւ հասկացել, որ մթնոլորտը կարող է շիկանալ, եւ նոր սադրանքներից ու բախումներից խուսափելու համար նախընտրել էին չմասնակցել․ Մհեր Սահակյանի միջադեպը դեռ լիովին չի հարթվել։

Իսկ որտե՞ղ էին «Պատիվ ունեմ» խմբակցության պատգամավորները, որոնց թեկնածուն էր Ղազարյանը։ ՊՈՒ խմբակցության ղեկավար Հայկ Մամիջանյանին հարցրինք՝ ինչո՞ւ էին իրենց առաջադրած թեկնածու Էդգար Ղազարյանին միայնակ թողել ՔՊ-ական ոհմակի առաջ։ «Նախ՝ «Պատիվ ունեմ» խմբակցությունը Մարդու իրավունքների հանձնաժողովում ներկայացված է նախագահով, Թագուհի Թովմասյանը ներկայացնում է ՊՈՒ խմբակցությունը։ Ինչ վերաբերում է ՔՊ-ի խուլիգանական պահվածքին, ապա յուրաքանչյուր նմանօրինակ դեպքից հաջորդն ավելի խուլիգանական է եւ խայտառակ, եւ ես չէի կարող պատկերացնել, որ նման պլաններ ունի ՔՊ-ն»,- ասաց Մամիջանյանը՝ հավելելով․ «Թեպետ Թագուհի Թովմասյանը 30-40 չէ, միայնակ 300-400 ՔՊ-ական էլ կարող է սանձել»։ Փորձեցինք ճշտել՝ եթե պատկերացնեիք, որ նման բան է լինելու, կմասնակցեի՞ք նիստին։ «Ես նման բան չասացի»։ Կարծում եք, որ հավասար մարտ ընթացավ, եւ Թագուհի Թովմասյանը կարողացա՞վ սանձել ՔՊ-ականներին։ «Ես համարում եմ, որ Թագուհի Թովմասյանը լավագույնս ներկայացրեց ընդդիմության տեսակետները, ինչպես նաեւ՝ թեկնածու Էդգար Ղազարյանը»։

Առավել մանրամասն՝ թերթի այսօրվա համարում: