Չի բացառվում, որ Ալեն Սիմոնյանն առաջիկայում սակուրաներ տնկի Կասկադում իր կատարած հանցանքի համար․ էդգար Ղազարյանը՝ Սիմոնյանի կողմից քաղաքացու վրա թքելու դեպքի մասին

Ալեն Սիմոնյանի կողմից կիրառված մեթոդը նաև Նիկոլ Փաշինյանին է բնորոշ։ Այս մասին այսօր խորհրդարանում լրագրողների հետ ճեպազրույցում ասաց ընդդիմության միասնական ՄԻՊ թեկնածու Էդգար Ղազարյանը։ 

Նա հիշեցրեց դրվագը, երբ Հանրապետության հրապարակից Գարեգին Նժդեհ երթուղու ժամանակ քաղաքացիներից մեկը պատշգամից Նիկոլ Փաշինյանի հասցեին քննադատական կամ վիրավորական բացականչություն էր արել, վերջինս տեսախցիկների համար լսելի ձայնով ասել էր՝ հանգիստ, հանգիստ քո հետևից էլ կգան, հետո մամուլում լուրեր տարածվեցին, որ գիշերը երիտասարդի նկատմամբ բռնություն է գործադրվել։

«Այդ բռնության հանգամանքների մասին ո՛չ ես եմ լսել, ո՛չ էլ դուք։ Այսինքն՝ Ալեն Սիմոնյանի կողմից կիրառված մեթոդը նաև Նիկոլ Փաշինյանին է բնորոշ։ Ինչ վերաբերում է ԱԺ նախագահի երեկվա պահվածքին, դա առանձնապես մեծ յուրահատկություն չունի, յուրահատկությունն իրականացնողի իմաստով է։ Քրեական օրենսգիրքն այդ վարքագիծը ներկայացնում է որպես «խուլիգանություն», դա ՔՕ 297 հոդվածն է, որի համար պատժի տարբեր տեսակներ կան, այդ թվում՝ հարկադիր աշխատանք։ Այնպես որ, չի բացառվում, որ Ալեն Սիմոնյանն առաջիկայում սակուրաներ տնկի Կասկադում իր կատարած հանցանքի համար։ Բայց դա ՔՕ միակ դրվագը չի, որ բնորոշ է ԱԺ նախագահին։ ՔՕ 438 հոդվածը նախատեսում է պաշտոնատար անձի նկատմամբ ունեցած իրական կամ ենթադրյալ ազդեցության օգտագործելը, որովհետև նա ըստ էության ինքնախոստովանական ցուցմունք է տվել, որ կարգադրել է ՊՊԾ աշխատակիցներին իրականացնել գործողություն։ ԱԺ նախագահի լիազորությունները, որը սահմանված է ԱԺ կանոնակարգ սահմանադրական օրենքում, չի նախատեսում, որ նա իրավասու է որևէ իրավապահ մարմնի աշխատակցի, այդ թվում՝ ՊՊԾ աշխատակիցներին, հանձնարարություններ տալ։ Եվ եթե նա իր իրական դիրքը նրանց նկատմամբ չարաշահել է, դա մյուս հանցագործությունն է, որն օրենքով հստակ նկարագրված է։ Եվ իր բախտից կա երրորդ հանցատեսակը, որն օրենքը նկարագրում է՝ 441-րդ հոդվածն է․ «Պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը»»,- ներկայացրեց Ղազարյանը։ 

Հիշեցնենք, որ երեկ Կասկադում մի քաղաքացի ԱԺ նախագահ Ալեն Սիմոնյանին մի քանի անգամ ասել է դավաճան, Սիմոնյանն էլ, ինչպես հետագայում չի հերքել, հանձնարարել է իր անվտանգությունն ապահովողներին փռել նրան ասֆալտին, ապա թքել է քաղաքացու դեմքին։ Դրանից հետո ոստիկանություն է  տարվել ոչ թե նշված խուլիգանության, այլ բացականչության հեղինակը։