Եթե ամեն ինչը քաղաքական հետևանք ունենար, այսօր Նիկոլ Փաշինյանը, Ալեն Սիմոնյանը և այդ խմբակը հայտնված կլինեին բանտում․ Սաղաթելյանը՝ ի պատասխան Սիմոնյանի գրառման

Երեկ հոխորտալուց հետո Ալեն Սիմոնյանը հասկացել է, որ հակառակ ազդեցություն ունեցավ, այսօր էլ փորձում է ներկայանալ զոհի կարգավիճակով։ Այս մասին այսօր լրագրողների հետ ճեպազրույցում ասաց ԱԺ «Հայաստան» դաշինքի պատգամավոր Իշխան Սաղաթելյանը՝ անդրադառնալով Ալեն Սիմոնյանի երեկվա պահվածքին և այսօրվա գրառմանը։ 

«Ալեն Սիմոնյանը և Նիկոլ Փաշինյանը մի բան պիտի հասկանան՝ կլինի Երևանի կենտրոնում, Հայաստանի հեռավոր գյուղերում, կամ Հայաստանի սահմաններից դուրս, միշտ էլ լինելու են արժանապատիվ քաղաքացիներ, ովքեր հիշեցնելու են, թե ովքեր են իրենք և երկիրն ինչ օրի են հասցրել, իսկ իրենց հակազդեցությունները՝ նման դեպքերին պատասխանել բռնություններով, ինչպես երեկ տեղի ունեցավ, ինչպես ոչ օրինաչափ կերպով այս պահին կալանքի տակ է գտնվում Մհեր Սահակյանը (ճեպազրույցը Սահակյանի ազատ արձակվելուց րոպեներ առաջ էր-խմբ․), ունենալու է հակառակ ազդեցություն»։ 

Ինչ վերաբերում է Ալեն Սիմոնյանի այն հայտարարությանը, թե այդ ամենը պետք է ունենա քաղաքական և իրավական հետևանքներ, ապա, ըստ Սաղաթելյանի, իրենք շատ ուրախ կլինեն։

«Մենք շատ ուրախ կլինենք, եթե Հայաստանում լիներ Սահմանադրություն, լիներ օրենք, և եթե ամեն ինչը քաղաքական հետևանք ունենար, այսօր Նիկոլ Փաշինյանը, Ալեն Սիմոնյանը և այդ խմբակը հայտնված կլինեին բանտում՝ ժողովրդին բերած դժբախտությունների, աղետի և իրենց ամենօրյա հակաիրավական գործունեության հետևանքով»,- ասաց նա։ 

Սաղաթելյանը հիշեցրեց իշխանությանը, որ աշխարհում ոչ մի իշխանություն հավերժ չէ՝ իրենց՝ առավել ևս,  և ամեն ինչի համար այս իշխանությունները պատասխան են տալու։

«Իրենց ձեռքերն արյունոտ են։ Իրենք հանձնել են մեր հայրենիքի մի մասը և շարունակում են հանձնել, մնացածը երկրորդական է, իրենք դրա համար պետք է պատասխան տան, մնացածը պարզապես իրենց մեղքերն է ավելացնում։ Իրենց գլխավոր մեղքը երկիրն այս վիճակին հասցնելն է»,- ընդգծեց Սաղաթելյանը։