44-օրյայի ժամանակ վիրավորված զինծառայողների համար կազմակերպվել են ՏՏ ոլորտի դասընթացներ. տղաները կարող են նաև աշխատանք գտնել (տեսանյութ)

44-օրյայի հետևանքով վիրավորված զինծառայողների համար 2021-ի հոկտեմբերին մեկնարկած ՏՏ դասընթացը երբևէ չի ընդհատվել, ծրագիրը շարունակվում է: Այս մասին 1lurer.am–ի հետ զրույցում տեղեկացրել է «Մտքի զարկ» ՀԿ համահիմնադիր Լիլիթ Սահակյանը։ Նա նշել է, որ առաջին փուլով 60 տղաներից 30-ը սովորել են արհեստական բանականության, 30-ը՝ Վեբ-ծրագավորման խմբում:

Հարկ է նկատել, որ նախաձեռնությունը սկսվել է պատերազմի օրերին հիվանդանոց ու վերականգնողական կենտրոններ՝ վիրավորներին այցի ժամանակ: Որոշվել է կազմակերպել տեղեկատվական տեխնոլոգիաների դասընթաց՝ վիրավոր և հաշմանդամություն ունեցող զինծառայողների համար:

«Առաջին փուլում մենք հասկացանք, որ այս տղաներն ունեն լուրջ խնդիրներ սոցիալական դաշտում: Կային տղաներ, որոնց ընտանիքում կար հաշմանդամություն ունեցող 3 անձ, ունեին ֆինանսական խնդիրներ դասերին հաճախելու հարցում»,–ասում է Լիլիթ Սահակյանը։

Հիշեցնենք, որ երբ Նիկոլ Փաշինյանը Գերմանիայում էր, հայ համայնքի հետ հանդիպման ժամանակ «Եվրոպացի և հայ մասնագետների ասոցիացիա» կազմակերպությունից Միքայել Մինասյանը հայտարարել էր, թե վիրավոր զինծառայողների համար իրենց մասնակցությամբ նախաձեռնված կրթական ծրագիրը լուծարվել է:

Այժմ Լիլիթ Սահակյանը հստակեցնում է` Գերմանիայի համահայկական հիմնադրամը «Եվրոպացի և հայ մասնագետների ասոցիացիա» կազմակերպության միջոցով մեկանգամյա աջակցություն է տրամադրել ծրագրին՝ 2 ամսվա կրթաթոշակի և 5 դասախոսի 4 ամսվա գումարը. ընդհանուր 20 հազար եվրո և 11 համակարգիչ: Ծրագիրն այժմ իրականացվում է Հայ-ռուսական (Սլավոնական) համալսարանի շենքում, տրամադրվել են համակարգիչներով կահավորված սենյակներ:

Նշենք, որ ծրագրի 2-րդ փուլը մեկնարկել է այս տարվա փետրվարին: 

«Ծրագիրը 2021-ից գործում է ամեն օր, շաբաթական վեց օր: Ծրագիրը գործում է մեկուկես տարի շնորհիվ ընկերների, բարերարների, գործընկերների, Հայաստանում գործող ընկերությունների, կազմակերպությունների, նաև Գևորգյան ընտանիքի»,–ասում է Սահակյանը։

Ըստ նրա՝ տղաներն իրենց գիտելիքով կարողանում են նաև աշխատանք գտնել:

Հայ-ռուսական համալսարանի Մաթեմատիկայի և մաթեմատիկական մոդելավորման ամբիոնի վարիչ Արման Դարբինյանն էլ տղաներին տրամադրում է գիտական խորհրդատվություն: Նրա խոսքով՝ խնդիր էր դրվել այնպիսի կրթական ծրագիր մշակել, որը պատերազմից վերադարձած տղաներին կդարձներ ոչ միայն ՏՏ, այլև անվտանգային ժամանակակից խնդիրներ լուծող պրոֆեսիոնալ մասնագետներ:

«Օր օրի կարողանում էին ավելի պրոֆեսիոնալ աշխատանք կատարել: Այնպիսի իդեալական ծրագիր մշակվեց, որ կարողացան հասցնել, որ ներկայացրին պատրաստի պրոդուկտ: Հրաշալի համագործակցություն է»,–ասում է նա:

Լրատվամիջոցի թղթակիցը զրուցել է նաև 44–օրյա պատերազմի մասնակիցներ Գեորգի Սահակյանի և Նարեկ Պողոսյանի հետ։

Ջրականում վիրավորված Գեորգի Սահակյանը վերականգնողական բուժման ընթացքում է տեղեկացել ծրագրի մասին, մասնակցել, ավարտել է, հիմա արդեն աշխատում է: Պատերազմի մասնակից Նարեկ Պողոսյանը սովորել է բարձրագույն մաթեմատիկա, ավարտել ծրագիրն ու հիմա աշխատում է դասընթացին միացած նոր սաների հետ:

«Ունենք նոր ուսանողներ՝ ավելի քան 30, փորձում ենք նրանց սովորեցնել բարձրագույն մաթեմատիկայի հիմքերը: Տղաները կանցնեն բարդ փուլի, ալգորիթմները կազմում են այս աշխատաշուկայի հիմքը: Արհեստական բանականությունը մուտք է գործում գյուղատնտեսությունից արդյունաբերություն, ռազմարդյունաբերություն, տղաները կհասկանան՝ իրենց գիտելիքը որտեղ օգտագործեն»,–ասում է Նարեկ Պողոսյանը:

Գեորգի Սահակյանն էլ նշում է, որ ցանկացել է փոխել ոլորտը և իմացել է այս դասընթացների մասին։

«Մինչ այդ ֆինանսիստ եմ եղել: Առաջարկվեցին քննություններ, անցա, հետո սկսվեց դասընթացը: Սկսել ենք անգլերեն, մաթեմատիկա... Արհեստական բանականության ուղղությունը պահանջված է, հիմա աշխատում եմ»,–ասում է նա:

Նյութն ամբողջությամբ` սկզբնաղբյուր կայքում: