Մեր կողքի հարևան փղին՝ Իրանին չենք նկատում․ կենացի մակարդակով ազատ առևտրի գոտի բացեցինք ու մոռացանք․ տնտեսագետ

Մենք մշտապես մի վարդագույն սցենար ենք մշակում և գնում ենք առաջ։ Չենք ուզում հաշվի առնել, որ գործոնային վերլուծությամբ մի բան, որ փոխվեց, ինչ է լինելու իրավիճակը։ Մենք անընդհատ ուզում ենք չտեսնել, անտեսել մեծ փիղը, որը մեր կողքի հարևանն է՝ մեր կողքի Իրանը։ Մենք այդ երկիրը հաշվի առնելո՞ւ ենք գոնե տնտեսական առումով, թե՞ չէ։ Այս մասին այսօր «Հայաստանը և եվրասիական ինտեգրման զարգացման հիմնական ուղղությունները տեսանելի հեռանկարում» թեմայով քննարկման ժամանակ տնտեսագետ Թաթուլ Մանասերյանը։

Նրա խոսքով՝ մենք շատ քիչ բան գիտենք Իրանի մասին. «Պիտի ճանաչենք, Իրանի դերակատարությամբ սցենար կարո՞ղ է փոփոխվել։ Ինչո՞ւ եք մոռանում, որ մենք կրկնակի սանկցիաների միջնորդավորված ազդեցություն ունենք ՀՀ-ում։ Եթե մենք փորձենք Մեղրիում առևտուր անել բանկային փոխանցումով, ապա նման բան մեզնից ոչ մեկին չի հաջողվի։ Իրավունք չունենք։ Մենք սանկցիաների տակ ենք ինքներս։ Այսինքն՝ մենք պետք է շատ հնարամիտ լինենք Վրաստանի կամ որևէ երկրի բանկով հաշիվ բացենք, որպեսզի սպասարկենք ընդամենը մի քանի մետրի վրա կատարած առևտուրը։ Ինչո՞ւ եք մոռանում, որ ընդամենը 5 տարի առաջ մենք Իրանի հետ ազատ առևտրի գոտի բացեցինք ու կենացի մակարդակով մոռացանք․․․ վերջ։ Սանկտ Պետերբուրգում դա հաստատվեց որպես Եվրասիական տնտեսական միության հետ ազատ առևտրի գոտի։ Եկեք սա չմոռանանք»,-նշեց Մանասերյանը։