Կանադայի արտգործնախարարը Բաքվին կոչ է արել բացել Լաչինի միջանցքը և ազատել հայ ռազմագերիներին

Կանադայի ԱԳՆ-ն շարունակում է կոչ անել Ադրբեջանի իշխանություններին բացել Լաչինի միջանցքը։ Այս մասին հայտարարել է Կանադայի ԱԳՆ ղեկավար Մելանի Ջոլին՝ ելույթ ունենալով հանրապետության խորհրդարանում։

Խորհրդարանի նիստից տեսանյութը հրապարակել է Կանադայի Հայ դատի հանձնախումբը սոցցանցի իր պաշտոնական էջում։ Պատասխանելով պատգամավոր Ջեյն Յիպի հարցին՝ Ջոլին ասաց, որ կիսում է Կանադայի և Ղարաբաղի հայերի մտահոգությունը։

«Մենք շարունակում ենք կոչ անել Ադրբեջանի իշխանություններին բացել Լաչինի միջանցքը։ Անհրաժեշտ է կանխել հումանիտար ճգնաժամի սրումը։ Կանադան աջակցում է հրադադարի համաձայնագրին, այդ թվում՝ հայ ռազմագերիների վերադարձին»,- ասել է նախարարը և նշել է հրադադարի ռեժիմի պահպանման կարևորությունը, որին աջակցում է նաև ԵՄ դիտորդական խումբը։

Հիշեցնենք, որ 2022 թվականի դեկտեմբերի 12-ին մի խումբ ադրբեջանցիներ փակել և շարունակում են փակ պահել Լեռնային Ղարաբաղը Հայաստանի Հանրապետության հետ կապող միակ ճանապարհը։ Ակցիայի մասնակիցները, ներկայանալով որպես «բնապահպաններ», վրաններ են խփել ճանապարհին։ Արդյունքում՝ 120.000 բնակիչ, այդ թվում՝ 30.000 երեխա, հայտնվել է շրջափակման մեջ՝ Լեռնային Ղարաբաղում։ Հունվարի 9-ին վթար է տեղի ունեցել էլեկտրահաղորդման գծում, սակայն ադրբեջանցի զինվորականները դեռ թույլ չեն տալիս վերականգնել գիծը։ Արդյունքում Լեռնային Ղարաբաղում սկսվեցին շարժական հոսանքազրկումներ։ Ադրբեջանը պարբերաբար դադարեցնում է գազի մատակարարումը. Շրջափակումը հանգեցրեց սննդամթերքի և առաջին անհրաժեշտության ապրանքների լուրջ դեֆիցիտի, հունվարի 20-ից ներդրվել է ռացիոնալացման համակարգ։