Ցույց են տալիս, որ գործ են անում, բայց ցույց չեն տալիս, որ փող են աշխատում

Վերջին տարիներին Երևանի քաղաքապետարանը տարատեսակ քայլեր է ձեռնարկում` կենտրոնի փողոցները բեռնաթափելու համար: Հիմա էլ նախատեսվում է 17կմ-անոց նոր ճանապարհ, որը կձգվի Արգավանդից Աշտարակ:

Հիշենք թեկուզ մարզերից Երևան ժամանող տրանսպորտային միջոցների համար սահմանափակումները: Այս նախաձեռնության հեղինակը Երևանի նախկին քաղաքապետ Կարեն Կարապետյանն էր, ով, գուցե, լինելով հարգարժան անձ, տրանսպորտով չէր երթևեկել, մարզային տրանսպորտով` հաստատ, հակառակ դեպքում, մարզերից եկողների համար նման սահմանափակումներ չէր մտցնի:

Այժմ մարզերից գալիս են երևանամերձ տարածքներ, որտեղից ևս մեկ կամ երկու տրանսպորտի օգնությամբ գալիս են կենտրոն, նախկինում նույն տրանսպորտն էր հասցնում կենտրոն, այժմ երկու:  Այս եղանակով ճանապարհները չեն բեռնաթափվի:

Դա հարվածեց մարզերից Երևան եկողների գրպանին և նպաստեց Երևանի փողոցներում  լրացուցիչ ժամանակ վատնելուն` սպասելով մայրաքաղաքի արդեն խնդրահարույց տրանսպորտին, իսկ մարզային տրանսպորտի գինն էլ չնվազեց:

Մինչ դեռ Երևանի ճանապարհների բեռնաթափման տարբերակներ կան, որոնք չեն իրականացվում:
Նախ այս տարիներին Երևանի քաղաքապետարանի թողտվությամբ երևանյան մայթերը վաճառվեցին` որպես տարածք բենզալցակայաններին, ավոտլվացման ու ճոխ սննդի կետերին: Այս կետերը մայթն օգտագործում են որպես տարածք, և որպես այդպիսին մայթ գոյություն չունի, իսկ հետիոտները անցնում են արդեն ճանապարհի մի հատվածով` ստեղծելով վթարային իրավիճակ:

Քաղաքապետ եղած ժամանակ Երվանդ Զախարյանը այս առիթով ասել էր` «դե արդեն վաճառել ենք, ինչ անենք»:
Երևանյան ճանապարհների մյուս խնդիրը ճանապարհների երրորդ գծերի վրա կարմիր գծերն են, որոնք իրենց հերթին խցանում են երթևեկությունը: Եթե առանց կարմիր գծերի հնարավոր էր ոստիկանության միջամտությամբ անխափան ճանապարհ բացել, ապա արդեն օրինական 1-ին գիծը փակ է, ճանապարհը` խցանված, որի համար վճարում են հենց քաղաքապետարանին:

Ինչի համար է այս ամենը, իհարկե, փողի: Նախ քաղաքապետարանը ոչ մաքուր ճանապարհով վաճառում է մայթերը, հետո քաղաքապետարանը սահմանափակում է մարզերից եկողների տեղաշարժվելու իրավունքը` կամայականորեն, հետո քաղաքապետարանը քաշում է տխրահռչակ կարմիր գծերը հենց ճանապարհի վրա ու փող աշխատում:
Եվ եթե հնարավոր է` վարկ է վերցնում` Երևանի ճանապարհների բեռնաթափման համար` փողով լուծելով իր իսկ կողմից ստեղծած ճանապարհների խցանումների հարցը: Այնպես որ ճանապարհների խցանումներն օգնում են քաղաքապետարանին վարկեր, նաև պետբյուջեից միջոցներ վերցնել` լուծելու այսպես ճարպկորեն ստեղծած արհեստական խնդիրները: Եվ ցույց են տալիս, որ գործ են անում, և ցույց են տալիս, որ մտահոգ են, և ցույց չեն տալիս, որ փող են աշխատում: