Կաթոլիկ եկեղեցու քահանային չեն կարող արտաքսել. փաստաբան

Հունվարի 25-ից ազատ են արձակվում Նորք Մարաշում վնասազերծված զինված հանցախմբի գործով կալանավորվածները: Սակայն նրանց նկատմամբ քրեական հետապնդումը չի դադարեցվել:

«Ոչ մեկն իրեն մեղավոր չի ճանաչում: Մեղադրանքի հետ առաջադրված որևէ հիմնավորում՝  մեզ չի ներկայացվել: Սակայն խափանման միջոցն այլ հիմք ունի: Ինչպես Նելլի Մինասյանն, այնպես էլ իմ մյուս պաշտպանյալները դեռ էն ժամանակ էին ասում, որ չեն խուսափի, խոչընդոտի քննությանը: Հիմա արդեն հասկացել են, և նրանց պայմանական ազատ են արձակել»,- newspress.am-ի հետ զրույցում ասաց Նելլի Մինասյանի, Խաչիկ Ավետիսյանի և ևս երկու աղջիկների փաստաբան Գիվի Հովհաննիսյանը:

Անդրադառնալով մամուլում տեղ գտած հրապարակմանն, ըստ որի, առաջիկայում ազատ կարձակվի նաև կալանավորված Հայր Անտոն Ծայրագույն Վարդապետ Թութունջյանը և նրա վրայից կվերցնեն մեղադրանքը՝ Հայաստանից հեռանալու պայմանով, Գիվի Հովհաննիսյանն ասաց. «Ես տեղյակ չեմ նման ինֆորմացիայի, բայց եթե դա իրականություն է, ապա դա արդարացի չէ: Եթե Հայաստանից հեռանա` քրեական հետապնդումը կդադեցվի՞: Եթե նա ունի Հայաստանի քաղաքացիություն և առաջադրված է մեղադրանք, ուրեմն պետք է այստեղ մնա և, անհրաժեշտության դեպքում կրի իր պատիժը: Ի՞նչ է նշանակում արտաքսել»:

Թե որքանով է հավաստի տեղեկությունը, newspress.am-ը փորձեց պարզել Անտոն Թութունջյանի փաստաբան Լևոն Բաղդասարյանից: Սակայն վերջինս տեղեկացրեց, որ ինքն արդեն մեկ շաբաթ է, ինչ չի պաշտպանում Թութունջյանի շահերը: Թե ով է հիմա, պաշտպանում իր նախկին պաշտպանյալի շահերը, Լևոն Բաղդասարյանը չգիտեր: Նա չցանկացավ անդրադառնալ նաև մամուլում տեղ գտած վերոհիշյալ հրապարակմանը` հարցրեք նրա փաստաբանին:

Սակայն մեզ այդպես էլ չհաջողվեց իմանալ, թե ով է լինելու Թութունջյանի փաստաբանը: Այդ մասին չգիտեն նաև Գյումրիի «Մարիամ» ռ/կ-ում, որտեղ նա աշխատել է: Շրջանառվող որոշ լուրերի համաձայն՝ հնարավոր է 71-ամյա հոգևորականի շահերով զբաղվի հանրային պաշտպանը: Հիշեցնենք, որ Գյումրիի «Մարիամ» ռ/կ-ի հոգեւոր բաժնի ղեկավար, մասնաճյուղի հիմնադիր, կաթոլիկ եկեղեցու քահանա հայր Անտոն Թութունջյանին ձերբակալել էին նոյեմբերի 25-ին, երբ ԱԱԾ-ն Ղորղանյան 83 հասցեում գտնվող ռադիոկայանում կատարել էր խուզարկություններ և առգրավել լրատվամիջոցի համակարգիչները: