Արցախահայության ու ադրբեջանցիների համատեղում չի կարող լինել, սա բացառված է․ Արցախի ԱԳ նախարար

Արցախը շարունակելու է իր պայքարը՝ իրացված ինքնորոշման իրավունքի միջազգային ճանաչման ուղղությամբ: Այս մասին այսօր Ստեփանակերտ-Երևան կայացած հեռուստակամուրջի ժամանակ ասաց Արցախի ԱԳ նախարար Սերգեյ Ղազարյանը:

Նախարարի խոսքով՝ հաշվի առնելով, որ երկար տարիներ Մինսկի խմբի շրջանակներում ընթանում են բանակցություններ և երեք խոշոր գերտերություն, ՄԱԿ-ի մշտական անդամներ՝ Ռուսաստանի Դաշնությունը, ԱՄՆ-ն և Ֆրանսիան երկար տարիներ ուղեկցում էին այս բանակցային գործընթացը, ուստի իրենց համոզմամբ, նրանք մինչ օրս պարտավորություն էին կրում ստեղծված իրավիճակի համար: 

«44-օրյա պատերազմի հետևանքների մասով ամեն մեկն այս երկրներից ունի իր պատասխանատվության բաժինը: Հաշվի առնելով, որ բազմիցս տարբեր մակարդակներում, այդ թվում՝ բարձր, հնչեցվել են հայտարարություններ, որ պատերազմը չունի ռազմական լուծում, սակայն Ադրբեջանում սանձազերծեցին 44-օրյա պատերազմը: Ինչպես տեղյակ եք, պատերազմի ավարտից հետո, Մինսկի խմբի համանախագահների հետ հանդիպման ժամանակ Ադրբեջանի նախագահը հայտարարել էր՝ «Չնայած ձեր հայտարարություններին, ես ռազմական ճանապարհով եմ լուծել»: Միևնույն ժամանակ, դա այս իրավիճակում անթույլատրելի է: Հայկական կողմերն այդ բանակցային ձևաչափում տրամադրված էին համապարփակ լուծում գտնելուն, իսկ Ադրբեջանը շարունակում էր այլ ուղղությամբ շարժվել, որպեսզի այդ տարիներին ռազմական ճանապարհով հարցին լուծում տար»,- նշեց Ղազարյանը:

ԱԳ նախարարի խոսքով՝ չնայած այս բոլոր դժվարություններին՝ Արցախի ժողովուրդը հավատարիմ է իր ընտրած ճանապարհին և գործադրելու է բոլոր ջանքերը: Միևնույն ժամանակ ակնկալվում է աշխարհասփյուռ հայության և գործընկերների ակտիվ մասնակցությունը պայքարում:

Ղազարյանը հորդորեց նաև քիչ օգտագործել ինտեգրացիա և նման արտահայտությունները. «Մենք հասկանում ենք, որ ընդհանուր առմամբ այդ ինտեգրացիա բառն ընկալված է ինչ-որ դրական առումով, սակայն այս պարագայում նման որևէ ձևակերպում բացառված է: Այս շրջափակումն էլ դրա վառ ապացույցն է: Եվ պարզ է, որ արցախահայության ու ադրբեջանցիների համատեղում չի կարող լինել, սա բացառված է»: