Պատկերասրահի վաճառքը հանձնարարվել է նախագահի աշխատակազմի ղեկավարի սանիկին

2015թ-ի հունիսին Ազգային պատկերասրահի տնօրենի թափուր պաշտոնի համար 9 կողմ, 1 դեմ ձայների հարաբերակցությամբ տնօրեն ընտրվեց Կամերային երաժշտության ազգային կենտրոնի տնօրեն Արման Ծատուրյանը:

Նշենք նաև, որ ընդհուպ մինչև ընտրությունները Մշակույթի նախարարությունը չէր հրապարակում թեկնածուների անունները` ընտրությունները կայացան մթության քողի տակ:

Պատկերասրահի տնօրենի թափուր պաշտոնի համար առաջադրվել էին ևս երկու թեկնածու՝ Արթուր Ավագյանը և Սաթենիկ Վարդանյանը:
«Տնօրեն դառնալու համար գիտնական լինել պետք չէ, կարևորը ղեկավարելու ձիրքն է»,- ահա այսպիսին էր նորաթուխ տնօրեն Արման Ծատուրյանի` պատկերասրահի տնօրեն լինելու տեսլականը:

Հավելենք, որ Արման Ծատուրյանը մասնակցել է «Սորոս» հիմնադրամի կողմից կազմակերպված դասընթացներին: Նա է կազմակերպել Ցեղասպանության 100-րդ տարելիցի միջոցառումները:

Մշակույթի նախարարությունը չթաքցրեց էլ, որ երեք թեկնածուներից ամենաշատ թվով գիտական աշխատություններ ուներ Սաթենիկ Վարդանյանը: Թեև Պատկերասրահի տնօրենի պաշտոնի համար կարևորվել էր գիտության թեկնածու լինելու հանագամանքը, սակայն կասեն` «ըդիկ կարևոր չէ»:

Կարող է հարց առաջանալ, թե ինչու այժմ անդրադարձանք խնդրին, սոսկ այն պատճառով, որ Պատկերասրահի տնօրենի առաջին գործերը թվում է, թե պետք է ուղղված լինեին նոր ծրագրերին` Պատկերասրահն ավելի հարմարավետ դարձնելու համար: Բայց նորընտիր տնօրեն Ծատուրյանը որոշել է, որ պատկերասրահին նոր շենք է պետք, ինչից կարելի է ենթադրել, որ Պատկերասրահը ևս ունենալու է ԱԳՆ շենքի ճակատագիրը:

Ու չի բացառվում, որ առաջիկայում Հրապարակի այս գեղեցիկ շինությունը ներկայացվի խարխուլ-փլատակ ու վաճառվի որևէ մեծահարուստի, գումարի մի մասն էլ գրպանվի, իսկ մյուս խղճուկ մասն էլ ուղղարկվի պետբյուջե:

Զավեշտալին այն է, որ Պատերասրահի հետևի արդեն հայտնի Արամի 30 շենքը գիշերով քանդեցին, քանի որ «մտահոգված» էին, թե պատկերասրահի ճանապարհը նեղ է, այնինչ, հող են նախապատրաստում պատկերասրահի վաճառքի համար:

Նշենք, որ Արամի 30-ը քանդել են գիշերով ոչ թե ճանապարհը լայնացնելու նպատակով, այլ պարզապես քաղաքապետարանը տարածքը վաճառել է և այնտեղ ևս ժամանակակից շինություն է լինելու:

«Դիփունքը խաբում ին ու խաբում»,- կասեր սունդուկյանի հերոսը:

Լավ, կարելի է ասել, ով է Արման Ծատուրյանը` ում գործուղել են Պատկերասրահ` իրագործելու Պատկերասրահի սահուն վաճառքը: Նա, ըստ մեր տեղեկությունների, ՀՀ նախագահի աշխատակազմի ղեկավար Վիգեն Սարգսյանի սանիկն է, ում ուսերին է դրված Պատկերասրահի վաճառքն իրականանցելու պատասխանատու գործը: