ՀՀ-ում կա համատարած կոնսենսուս՝ հարևան պետությունը մտադրություն ունի ԼՂ-ում էթնիկ զտում իրականացնել և Հայաստանի նկատմամբ նոր ագրեսիայի հող նախապատրաստել. իշխանական պատգամավոր

Եթե ուշադրություն դարձրեցիք, ապա պարոն Թևանյանը հայտարարության տեքստի մեջ մի այսպիսի ձևակերպում արեց, որ «Ադրբեջանը հենվելով կամ խմբագրելով Պրահայում ձեռք բերված համաձայնությունները՝ փակել է Լաչինի միջանցքը»: Իր ելույթն ԱԺ-ում այսօր այսպես սկսեց ԱԺ «Քաղաքացիական պայմանագիր» խմբակցության պատգամավոր Մարիա Կարապետյանը:

Վերջինս ընթերցեց հանձնաժողովի դիրքորոշումը, որում մասնավորապես ասվում էր, որ արտաքին հարաբերությունների հանձնաժողովն առաջարկում է խորհրդարանին չմասնակցել հայտարարության տեքստի քվեարկությանն այն ըմբռնմամբ, որ դեռևս դեկտեմբերի 14-ին ԱԺ-ն ընդունել է հայտարարություն Լաչինի միջանցքի արգելափակման վերաբերյալ: Եվ այդ հայտարարությունը շարունակում է ուժի մեջ մնալ: Առհասարակ, ՀՀ ԱԺ-ն անկախությունից ի վեր՝ ընդամենը 14 հայտարարություն է ընդունել յուրաքանչյուր թեմային անդրադառնալով ընդամենը մեկ անգամ:

«Այնուամենայնիվ, հաշվի առնելով հարցի կարևորությունը, նաև առնվազն 2 նոր հանգամանք, դրանք են Ադրբեջանի կողմից Լաչինի միջանցքում ոստիկանների սպանությունը, և ՄԱԿ-ի արդարադատության միջազգային դատարանի որոշման չկատարելն Ադերբեջանի կողմից, կարելի էր ընդունել ԱԺ-ի նոր հայտարարության տեքստ՝ վերահաստատելով դեկտեմբերի 14-ի հայտարարության դիրքորոշումները և ավելացնել այս նոր բաղադրիչները: Այս նպատակով մենք առաջարկ արեցինք «Հայաստան» դաշինքին՝ փորձել գտնել հայտարարության տեքստի փոխադարձաբար ընդունելի բառապաշար, որովհետև շատ հարցերում էլ համակարծիք ենք այնուամենայնիվ. նույնկերպ ենք մտածում, օրինակ՝ Ալիևի մղումների մասին»,- նշեց Կարապետյանը:

Շարունակելով հայտարարության տեքստը՝ նա նշեց, որ ՀՀ-ում կա համատարած կոնսենսուս, առ այն, թե ինչ մտադրություն ունի հարևան պետությունը, այն է՝ ԼՂ-ում էթնիկ զտում իրականացնել և Հայաստանի նկատմամբ նոր ագրեսիայի հող նախապատրաստել:

«Առաջարկվող հայտարարության տեքստի բոլոր ձևակերպումները, որոնք նույնն են կամ նման են դեկտեմբերի 14-ին ընդունված հայտարարության տեքստի ձևակերպումներին, ամբողջությամբ մեզ համար ընդունելի են: Հետևաբար, «Հայաստան» դաշինքի խմբակցության քարտուղար Արծվիկ Մինասյանի հետ մենք նորմալ քննարկում ունեցանք, սակայն, չենք կարողացել գալ ընդհանուր համաձայնության՝ հայտարարության տեքստի հետ՝ կապված մի քանի բառերի շուրջ: Որոնք են այդ անհամաձայնությունները: Ըստ ընդդիմության՝ Հայաստանը պետք է հարցերը կոշտ ներկայացնի միջազգային հանրությանը և միջազգային հանրությունն ըստ այդմ կձևավորի իր դիրքորոշումը: Մեր մոտեցումն այն է, որ Հայաստանն իր դիրքորոշումները պետք է ներդաշնակեցնի միջազգային հանրության դիրքորոշումների հետ, որովհետև, եթե ԼՂ-ի հիմնախնդիրը, և առհասարակ, Լաչինի միջանցքի վերաբացումը լուծում ունեն, ապա այդ դերակատարների ներգրավմամբ, այսինքն՝ միջազգային հանրության նեգրավմամբ, ապա ՀՀ-ն ի զորու չէ պայքարելու տարածաշրջանի դեմ»,- նշեց Կարապետյանը և հավելեց, որ այսպիսով՝ ՀՀ արտաքին քաղաքականության տեսանկյունից կարևոր կլիներ հայտարարության տեքստի մեջ նշել ԼՂ-ի հայության իրավունքների և անվտանգության ապահովման հարցը, միջազգային երկխոսության կարևորության հարցը, ինչպես նաև ԼՂ՝ Լաչինի միջանցք, փաստահավաք խմբի ուղարկման կարևորության հարցը:

Նրա խոսքով՝ ընդդիմության համար սրանք չեն կարևոր, կարևոր են այլ շեշտադրումներ: 

Ելույթի վերջում Կարապետյանն իր գործընկերներին կոչ արեց չմասնակցել այդ հայտարարության տեքստի քվեարկությանը: