Մենք շատ արագ գնում ենք դեպի երկրորդ սառը պատերազմ, որը կարող է նաև տաք պատերազմ լինել. միջազգայնագետ

Մեր անվտանգության համակարգը և դիվանագիտությունը փլուզված է: Այս մասին այսօր «Հայաստանի անվտանգության փլուզվող համակարգը» թեմայով քննարկման ժամանակ ասաց քաղաքագետ, միջազգայնագետ Արթուր Խաչիկյանը:

«Աշխարհում հիմա մեծ փոփոխություններ են տեղի ունենում, մենք շատ արագ գնում ենք դեպի երկրորդ սառը պատերազմ, որը կարող է նաև տաք պատերազմ լինել: Աշխարհում երկու բևեռներ են ստեղծվում, դեռ ստեղծվում են, ես չէի ասի, թե հիմա մենք երկբևեռ աշխարհում ենք ապրում: Եվ մեզ պես պետությունների համար մեր տարածաշրջանում ընտրություն կա՝ կա՛մ Արևմուտքի հետ, կա՛մ Ռուսաստանի հետ, կա՛մ պետք է այնպիսի ներուժ ունենալ, որ նեյտրալ մնանք, ինչպես, օրինակ, որոշ չափով փորձում է անել Թուրքիան, որոշ առումով՝ Վրաստանը և Չինաստանը»,- ասաց միջազգայնագետը: 

Նրա խոսքով՝ մենք չարեցինք այդ երեք բանից որևէ մեկը՝ մենք չկարողացանք Արևմուտքից ստանալ ինչ-որ ռեալ երաշխիքներ, Արևմուտքի հետ կառուցել անվտանգային հարաբերություններ, գոնե ստանալ մեր սահմանների անվտանգության երաշխիքներ, գոնե՝ սպառնալիք Ալիևին, որ եթե սկսվի հարձակում Հայաստանի վրա կամ եթե Արցախի ժողովուրդը տեղահանվի, լինելու են սանկցիաներ, անգամ դա մեզ չհաջողվեց, այսինքն՝ տապալվեց մեր արևմտյան դիվանագիտությունը:  

Ինչ վերաբերում Ռուսաստանին և ՀԱՊԿ-ին, ըստ Խաչիկյանի, դա ևս բացարձակ տապալվեց, և հայ-ռուսական հարաբերություններն այս վիճակում երբևիցե չեն գտնվել:

«Մի քանի օր առաջ, որ բացեիբաց ծաղրում էին մեր ղեկավարին, դա շատ վիրավորական էր, միաժամանակ մենք խնդրում եք Ռուսաստանից աջակցություն»,- ասաց նա՝ ևս մեկ անգամ արձանագրելով, որ տապալվել են Ռուսաստանի հետ հարաբերությունները:

Քաղաքագետը նկատեց, որ մենք չենք կարողացել նաև այնպիսի ներուժ ստեղծել, որ կարողանանք մենք ինչ-որ ձևով օգնենք մեզ, դա ևս չի արվել: