Աջափնյակի կրակոցներից տուժողները հանցավոր աշխարհում հայտնի «Շիբ»-ն ու «Ֆազ»-ն են

Երեկ newspress.am-ը տեղեկացրել էր, որ Աջափնյակ համայնքում կրակոցներ են եղել, որոնց հետևանքով հրազենային վիրավորում է ստացել 2 քաղաքացի: Տուժածներին տեղափոխել են Հանրապետական հիվանդանոց:

Այսօր մեզ հայտնի դարձավ, որ վիրավորներից մեկը հանցավոր աշխարհում հայտնի «Շիբ» մականունով Արթուր Թ.-ն է, ով նախկինում դատապարտված է եղել: Երկրորդ վիրավորը Երևանի ավագանու անդամ  Գրիգորի Գրիգորյանի եղբայր` «Ֆազ» մականունով Սերգեյ Գ.-ն է, ով Աջափնյակի  թաղապետ Արտավազդ Սարգսյանի ընկերն է:

Հանրապետական հիվանդանոց մեր հեռախոսազանգին, նախ պատասխանեցին, որ տեղափոխել են վիրաբուժարան: Վիրաբուժարանից էլ փոխանցեցին, որ պետք է կապ հաստատել երկրորդ վիրաբուժարանի հետ, որտեղից մեզ որևէ տեղեկատվություն չտրամադրվեց, թե հրազենային վիրավորում ստացածներ հիվանդները ինչ վիճակում են: Մեզ հետ զրուցող բժիշկը նյարդայնացավ, որ հեռախոսով ոչ մի հարցի չի պատասխանի:

Այնուհետև Newspress.am-ը փորձեց կապ հաստատել Աջափնյակի թաղապետի հետ` ճշտելու, արդյոք տեղյակ է իր համայնքում տեղի ունեցած կրակոցներից և ինչ մտերմություն ունի վիրավորված «Ֆազ» Սերգեյ Գ.-ի հետ, որքան էլ տարօրինակ էր, բայց թաղապետարանից մեզ խնդրեցին հարցը ճշտել քաղաքապետարանի հետ: Քաղաքապետարանը զարմացած է, թե ինչու է թաղապետարանը հարցը տեղափոխել է քաղաքապետարան: