Մալաթիա Սեբաստիա համայնքի տները քանդման եզրին են

Երևանի քաղաքապետարանը Ասիական զարգացման բանկի հետ 112 մլն դոլար արտոնյալ վարկի պայմանագիր է կնքել 22 տարի մարման ժամկետով` լողացող տոկոսադրույքով, որն ուղղելու է քաղաքի կայուն զարգացման ծրագրին: Ըստ այդ ծրագրի նոր ճանապարհ է բացվելու:

«17 կմ նոր ճանապարհահատված պետք է կառուցվի մայրաքաղաքում: Ներկամրջային հանգույց է նախատեսվում Կարմիր բլուրից հետո Արգավանդ գյուղի հատվածում՝ Հրազդան գետի վրա կլինի 250 մետր մետաղական կամուրջ: Լինսի հիմնադրամով կառուցված Արգավանդի կամուրջը կիսատ է մնացել՝ դեպի Շիրակ տանող հատվածը, Կարմիր բլուր տանող հատվածը չկա, գալիս ավարտվում է Իսակովի պողոտայում: Լինելու է 1 խոշոր կամրջային հանգույց, որը կապելու է դա դեպի Բաբաջանյան փողոց: Արգավանդ-Բաբաջանյան փողոցի հատվածն է ընդգրկվելու Մալաթիա-Սեբաստիայում, Բաբաջանյան փողոցը վերակառուցվում է, Բաբաջանյանով կառուցվելու է Տիչինայով՝ Թթաստան կոչվող թաղամասի մոտով դեպի Աշտարակի խճուղի: Այդ հատվածում ընդհանուր երկարությունը 6.8 կմ է լինելու ճանապարհի եւ 3 անցուղի է նախատեսվում, նաեւ 3 թունելային անցում Արմենիկումի փողոցով դեպի Մարս գործարան, դեպի 4-րդ գյուղ՝ Հաղթանակ եւ մեկ ուղեանց նախատեսվում է կառուցել Շահումյանի հայտնի ջրանցքի վրա: Նաեւ Դավիթաշենի կամրջի կապումն է նախատեսվում Աշտարակի խճուղու հետ»,- ասաց փոխքաղաքապետ Կամո Արեյանը:

Նոր ճանապարհների կառուցման համար նախատեսվում է վերաբնակեցում իրականացնել: Կամո Արեյանի խոսքերով՝ «220 օրինական գույք կա, 350 ոչ օրինական գույք, որի համար նույնպես պետք է փոխհատուցում տանք: Նախատեսում ենք վերաբնակեցման համար 13.8 մլն դոլար տրամադրել: Այս տարածքի համար Ասիական բանկն ասել է, որ եթե մարդանց փոխհատուցման խնդիրը լուծված չլինի՝ ֆինանսավորումը չի լինի»: