Սա հորով-մորով մարսենք, հաջորդի մասին կմտածենք. Լյովա Խաչատրյան

Ակտիվորեն շրջանառվում է այն լուրը, որ ԱԺ պատգամավոր Սամվել Ալեքսանյանը մտադիր է Ընտրական օրենսգրքի փոփոխություններից հետո ռեյտինգային քվեարկությամբ 2017թ-ի ԱԺ ընտրություններում իր ուժերն այս անգամ փորձել ոչ թե Մալաթիայից, այլ հայրենի Ապարանից՝ Մալաթիան թողնելով իր քրոջ փեսային՝ ԱԺ Պաշտպանության, ներքին գործերի եւ ազգային անվտանգության հանձնաժողովի նախագահ Կորյուն Նահապետյանին:

newspress.am-ը այս մասին զրուցեց ապրանցի ԲՀԿ -ական պատգամավոր Լյովա Խաչատրյանի հետ: Վերջինս ասաց, որ Սամվել Ալեքսանյանի Ապարանից ընտրվելու շանսերը  բարձր են: Իսկ հնարավո՞ր է, որ Սամվել Ալեքսանյանը` որպես մականունավոր, խորհրդարանական ընտրություններից դուրս մնա, մեր հարցին ի պատասխան Լյովա Խաչատրյանը նշեց, որ Սամվել Ալեքսանյանն իր մականունը ձեռք է բերել մանկության տարիներին: Իսկ իր առաջադրման մասին Լյովա Խաչատրյանը` դեռ չգիտի

«Սա հորով-մորով մարսենք, հաջորդի մասին կմտածենք, մեկ տարի դեռ կա»,- ասաց նա:

Անդրադռանալով այն հարցին, թե Ապարանում մեծ ազդեցություն ունեցող, Քննչական կոմիտեի նախագահ Աղվան Հովսեփյանը ում թեկնածությունը կպաշտպանի, Լյովա Խաչատրայանը ասաց, որ որոշողը Ապարանի գրանցում ունեցողներն են լինելու իրենց քվեով: Լյովա Խաչատրյանից հետաքրքրվեցինք` փաստորեն Աղվան Հովսեփյանը միայն մեկ քվեի համարժեք ազդեցությո՞ւն ունի Ապարանում: Մեր այս հարցից ապարանցի պատգամավորը զայրացավ` ասելով, որ Աղվան Հովսեփյանը Ապարանի գրանցում չունի ու հորդորեց իրեն նման հարցեր չտալ:

«Մարդավարի խոսում ենք, նորմալ հարցեր տվեք, հիմա ոչ թե ընտրություններն, այլ տենտեսական հարցերն են կարևոր»,-զրույցը եզրափակեց Խաչատրյանը:

Հիշեցնենք, որ Սամվել Ալեքսանյանը Նիգ Ապարան հայրենակցական միության նախագահն է, որի պատվավոր նախագահն Աղվան Հովսեփյանն է: Վերջինս Ալեքսանյանի մասին խոսելիս միշտ ասում է, որ նա այն եզակի մեծահարուստ բարեգործներից է, ով բարեգործություն անելուց առաջ այդ մասին չի ճչում, ստվերում է մնում: