Ամեն ինչ արվում է, որ ՌԴ-ի դիրքերը տարածաշրջանում թուլացվեն, և պատկերացում չկա, թե նրան ինչով պետք է փոխարինել. Մինասյան (տեսանյութ)

Եթե Նիկոլ Փաշինյանն ու իր իշխանությունը Ռուսաստանի Դաշնությանը դեռևս համարում են ռազմավարական գործընկեր, հարկավոր է հարցերը քննարկել կոնկրետ մեխանիզմների միջոցով։ Այս մասին ԱԺ-ում լրագրողների հետ զրույցում ասաց ԱԺ «Հայաստան» խմբակցության պատգամավոր Արծվիկ Մինասյանը՝ անդրադառնալով Նիկոլ Փաշինյանի այն հայտարարությանը, որ եթե ՌԴ-ն չի կարողանում պաշտպանել Արցախը, ապա պետք է դիմի ՄԱԿ անվտանգության խորհուրդ։

«Ես դա համարում եմ անպատասխանատու հրապարակային հայտարարություն։ Ինչո՞ւ ես դու դա անում։ Այդ հայտարարությունը հերթական դեմագոգիան է, որ դու հակառուսականություն ես սերմանում, արեւմուտքին փորձում ես սիրաշահել, և դրանով չես ուժեղացնում քո անվտանգության համակարգը»,- ասաց Մինասյանը։

Պատգամավորը նշեց, որ ինքը կասկածում է, թե գործընկերային քննարկումները սպառվել են.

«Եթե մենք շարունակում ենք ՀԱՊԿ համակարգի շրջանակներում ՌԴ-ի հետ բարեկամության և փոխադարձ օգնության պայմանագրի, ռուսական բազայի առկայության պայմաններում, այլընտրանք չունենալու դեպքում այս անվտանգության համակարգն ունենալ, նշանակում է՝ այդ տիպի հայտարարությունները պետք է ամենավերջում լինեն, երբ այլևս այս բոլոր պայմանները չկան։

Ամեն ինչ արվում է, որ ռուսական աջակցությունը այս պայմաններում ոչ թե լինի կոնկրետ հետևանք, այլ ամեն ինչ արվում է, որ ՌԴ-ի դիրքերն այս տարածաշրջանում թուլացնեն, և պատկերացում չկա, թե ինչով պետք է փոխարինել։ Եթե ռուսական կողմն ասում է՝ դուք ադրբեջանցիների հետ ուղիղ բանակցությունների մեջ մի մտեք, եթե Արցախի անվտանգության երաշխավորը ես եմ, դուք էլ իմ հետ միասին, ինչո՞ւ եք անմիջական բանակցությունների մեջ մտնում, պայմանավորվածություններ եք ձեռք բերում՝ շրջանցելով ինձ, երբ դուք առանց մեզ Պրահայում ինչ-որ համաձայնության եք եկել»։

Անդրադառնալով Ադրբեջանի նախագահ Իլհամ Ալիեւի այն հայտարարությանը, որ եթե Հայաստանը ցանկանում է 29 հազար քառ կմ տարածքում հանգիստ ապրե,լ ապա պետք է ճանաչի Արցախն Ադրբեջանի կազմում, Մինասյանն ասաց. «Հենց այստեղ է, որ միջազգային հանրությունը ձևակերպում էր ինքնորոշման իրավունքը, հավասարազոր տարածքային ամբողջականության և ուժի կամ դրա սպառնալիքի չկիրառման պահանջների հետ, սա է խնդիրը, որ ՀՀ իշխանությունները պետք է առաջ տանի՝ Արցախը չի կարող լինել Ադրբեջանի կազմում։ Այդ մոտեցումը եղել է ոչ միայն հայկական կողմի, այլև միջազգային հանրության կողմից ընդունված մոտեցում»։