Տրանսպորտային վիճակը Երևանում վատթարացել է. Տիգրան Ավինյան

Ես ուզում եմ ներողություն խնդրել երևանցիներից, որովհետև ակնկալվում էր, որ մարտի 1-ից 237 նոր ավտոբուս՝ 87 MAN 12 մետրանոց և 150 Zhontong ավտոբուսները, կկարողանան տեսնել Երևան քաղաքում։ Ցավոք սրտի, դա տեղի չի ունեցել, և դա մեր մեղավորությունն է, մեր պատասխանատվությունն է, և ես դրա համար ներողություն եմ խնդրում: Այս մասին այսօր Կառավարության նիստում ասաց Երևանի փոխքաղաքապետ Տիգրան Ավինյանը: 

«Ինչ վերաբերում է արդեն բուն ավտոբուսների երթուղի մտնելուն, մենք մոտավորապես 30 օրվա ընթացքում կարող ենք ունենալ, մենք զուգահեռ անցկացնում ենք մրցույթները. որոշակի գործընթաց կա, որ մենք արդեն սկսել ենք իրականացնել»,- ասաց նա:

Ավինյանն անդրադարձավ ընդհանուր տրանսպորտային թեմային: 

«Եթե մենք հիմա շրջենք Երևանում և հարցնենք՝ ինչպե՞ս է տրանսպորտային իրավիճակը Երևանում, բոլորը կասեն, որ վատթարացել է, որովհետև հին «Գազել»-ները վատ էին, բայց քանակապես շատ էին: Այսօրվա ավտոբուսների քանակը բավարար չէ Երևանի ամբողջ տրանսպորտային ցանցի սպասարակման համար»,- նշեց նա: 

Փոխքաղաքապետի խոսքով՝ էականորեն խնդիրը լուծվում է, երբ նոր 237 ավտոբուսները մտնում են ցանց:

«Ավելացնեմ, որ մենք ունենք Higer չինական ավտոբուսները, որոնք հիմա վերանորոգվում են և դրանք նույնպես մտնելու են ցանց: Խնդիրն էականորեն մեղմվելու է, բայց սա դեռ համակարգայիկն լուծումը չէ: Այս տարվանից մենք արդեն իսկ ունենք հաղթող միասնական տոմսային համակարգ ներդրման համար և միասնական տոմսային համակարգը ներդրվելու է և՛ ավտոբուսներում, և՛ մետրոյում, ու ավտոբուսների և մետրոյի ցանցի աշխատանքը համադրվելու է իրար հետ, բերվելու է մի տրամաբանության: Ավտոբուսների առանձնացված գծեր ենք սկսելու ունենալ ամենայն հավանականությամբ այս տարվանից, որն առավելություն է տալու մարդկանց, ովքեր օգտվելու են ավտոբուսից, որովհետև ավտոբուսը խցանումների մեջ չի լինելու և մեր նպատակն է հնարավորինս բոլորին մղել դեպի հանրային տրանսպորտ, որպեսզի մեր քաղաքի բեռնաթափումը, խցանումների ծավալը նույնպես նվազեցնենք»,- խոստացավ քաղաքապետի ՔՊ-ի թեկնածուն:

Նա նշեց, որ կանգառասրահներում կլինեն վահանակներ, որոնք ցույց կտան, թե որ ավտոբուսը քանի րոպեից է մոտենալու: