Առաջիկայում բացահայտումներ կլինեն և չի բացառվում, որ 100 մլրդ-ից ավելի շրջանառություն դուրս բերվի ստվերից . Բադասյան

«Նոր Զովք» սուպերմարկետների ցանցը միակը չէ, այլ տնտեսվարող սուբյեկտների մոտ իրականացված ուսումնասիրություններից հետո կլինեն նոր բացահայտումներ։ Այս մասին ԱԺ-ում լրագրողների հետ զրույցում ասաց ՀՀ ՊԵԿ նախագահ Ռուստամ Բադասյանը։

«Առգրավված սերվերներից, մեր նախնական դիտարկումներով, հաշվել ենք տասնյակ միլիարդավոր դրամների ստվերային շրջանառություն։ Խոսքը միայն «Նոր Զովքի» մասին չէ, տնտեսվարող սուբյեկտները բազմաթիվ են։ Չի բացառվում, որ 100 մլրդ և ավելի ստվերային շրջանառություն դուրս բերվի։ Նկատի ունեմ միայն այն դեպքով, որով հաղորդագրություն ենք տվել և հայտնաբերվել են սերվերներ»,– ասաց Բադասյանը։

Նա տնտեսվարողներին հորդորեց ճշտված հաշվարկներ ներկայացնել և տույժերով հանդերձ սկսել վճարումներ կատարել` տհաճ հետևանքներից խուսափելու համար։

ՊԵԿ նախագահը վստահեցրեց` ստվերային շրջանառությունը հայտնաբերվելու է և ոչ միայն ենթադրյալ օգուտներն են կորցնելու, այլև ավելի բարդ իրավիճակում են հայտնվելու։

Բադասյանը նկատեց, որ խոսքը միայն սուպերմարկետների մասին չէ:

«Տասնյակ միլիարդներով թաքցրած շրջանառություն կա, դա և շինարարական ընկերություններ են, այլ ընկերություններ են: Անպայման չէ, որ դա լինի միայն ՀԴՄ-ի և ծրագրային ապահովման միջոցով: Իսկ մեր քաղաքական թիմի թիրախում որևէ բիզնես չկա: ՊԵԿ-ը հավասար մոտեցումներով որ դեպքում հայտնաբերում է նման երեւույթ, խիստ հետևանքներ են լինելու»,-ասաց Բադասյանը: