Հանցագործություն կատարելու ցանկություն և մտադրություն ունեցողը պետք է գիտակցի, որ ոստիկանը կարող է զենք կիրառի. Արմեն Խաչատրյան

Պարեկային ծառայությունը ստեղծվեց կարճ ժամանակահատվածում, բայց կադրերի հավաքագրման գործընթացը բավականին ֆիլտրերի միջով անցավ։ Ցանկացած ծառայությունում էլ խնդիրներ լինում են, չպետք է այնպիսի ակնկալիք ունենանք, որ պարեկները սուրբ են և նրանց ընտրությունը կատարվել է կատարյալ ձևով։ Այս մասին լրագրողների հետ զրույցում ասաց ԱԺ «Քաղաքացիական պայմանագիր» խմբակցության պատգամավոր Արմեն Խաչատրյանը։

«Իհարկե և՛ ընտրության պահին են խնդիրներ եղել, գուցե լավ չեն ստուգել ինչ-որ պարեկների անցյալ և այլն»,- նշեց Խաչատրյանը՝ հավելելով, որ բավականին մեծ է հսկողությունը և վերահսկողությունը պարեկների նկատմամբ և ցանկացած դրսևորում լուրջ իրավական գնահատականի է արժանանում։

Ինչ վերաբերում է պարեկի կողմից հրազեն կիրառելուն, ինչի հետևանքով մարդ է մահացել, Խաչատրյանը նշեց. «Մարդը զինված՝ կացնով, գտնվում է ուրիշի տան անասնագոմում։ Տանը գտնվում են կանայք՝ 17 տարեկան աղջիկ և նրա մայրը։ Ինչի՞ց վերցրիք, որ նա գնացել է գողության։ Մենք ունենք Մարալիկի դեպք։ Մարդը զինված մտել է ուրիշի տուն, որտեղ գտնվում է երկու կին, ժամանել է ոստիկանությունը, բազմաթիվ զգուշացումներ են տրվել, որ զենքը ցած դնի, որը չի արել, սկսել է կիրառել այն։ Եթե ոստիկանը զենք ունի, ապա դա տրված է նրա համար, որ վնասազերծի հանցագործին։

Մենք սովոր ենք, որ ոստիկանը պետք է տնավարի վարվի՝ ախպեր ջան և այլն, բայց կան հստակ օրենսդրական ակտեր, թե ոստիկանը որ պայմաններում պետք է օգտագործի կամ կիրառի հրազենը, եթե դա համապատասխանում է նորմերին, ուրեմն նրա գործողություններն իրավաչափ են։

Քննություն է ընթանում, կպարզվի՝ համապատասխանում է, թե ոչ։ Հանցագործություն կատարելու ցանկություն և մտադրություն ունեցողն էլ պետք է գիտակցի, որ ոստիկանը կարող է զենք կիրառի»։