Բրյուսովը բարեկիրթ համալսարանի համբավ ունի, բայց այն խարխլված է․ Դավիթ Գյուրջինյան

Բրյուսովի համալսարանին պետք է վերադարձնել, ճիշտ հունի վրա դնել, որպեսզի համալսարանն անի իր աշխատանքը, որը տասնամյակներ շարունակ շատ լավ է արել։ Այս մասին համալսարանում դասախոսական անձնակազմի հետ հանդիպման ժամանակ ասաց Բրյուսովի անվան պետական համալսարանի նորանշանակ ժամանակավոր պաշտոնակատար Դավիթ Գյուրջինյանը։

«Իմ նշանակումը ժամանակավոր է, ես լավ աշխատանք ունեմ՝ Լեզվի կոմիտեի նախագահն եմ, ես Բրյուսովից եմ գնացել այնտեղ, հիմա էլ գալիս եմ Բրյուսով՝ որոշակի առաքելությամբ։ Տեսնում եմ և ծանոթ, և անծանոթ մարդկանց, որոնց հետ մենք պետք է աշխատենք խաղաղ, բարեկիրթ։ Բրյուսովը բարեկիրթ համալսարանի համբավ ունի, բայց այն, ցավոք, խարխլված է։ Գիտեմ, որ լարված ժամանակներ են, որոշ մարդիկ մտահոգված են իրենց պաշտոնավարման հարցերով, կան մարդիկ, որոնք տուժել են, և  այդ մարդկանց պետք է հատուկ շնորհակալություն հայտնել կամքի ու դիմացկունության համար։ Ես կուզեմ, որ մեր համատեղ աշխատանքի ընթացքը անխափան լինի, և համալսարանն ինքնամաքրվելով գտնի իր համբավավոր անունը»,- նշեց Գյուրջինյանը։

Գյուրջինյանն անդրադարձավ իրեն վերագրվող քննադատությանը, թե ինքը գալիս է լուծարելու համալսարանը։ Նա նշեց, որ դա անել չի կարող նաև անձնական պատճառներով։

«Իմ երկու դուստրերն ավարտել են այս համալսարանը, պետք է ասեն, որ ավարտել են մի բուհ, որը լուծարվե՞ց, և դա իր հայրը արե՞ց։ Սա միամիտ և ոչ միամիտ երեխաների ձեռքին զենքի նման է։ Ի՞նչ է՝ գրագետ մարդուն պետք է բացատրես, որ պետական ծրագիրը մինչև 2030 թվականն է նախատեսել դա։ Ես բավականին դիմացկուն եմ, բավականին երիտասարդ եմ՝ 60 տարեկան, գալիս եմ եռանդուն աշխատելու, ուզում եմ դուք էլ նույնը անենք, որպեսզի ունենք նվաճումներ և աշխատելը հաճելի լինի բոլորին»,- ընդգծեց Գյուրջինյանը։