Փաշինյանը խոստովանեց՝ կաշկանդված է հայտարարել, որ Արցախը չի լինելու Ադրբեջանի կազմում

Հայաստանի Հանրապետության օրակարգում է Լեռնային Ղարաբաղի ժողովրդի անվտանգության և իրավունքների հարցը: Այն, ինչ այս վերնագրի ներքո և այս շրջանակի մեջ չի տեղավորվում, նշանակում է, որ այդ հարցի շահառուն Լեռնային Ղարաբաղի ժողովուրդն է: Ես ինչ եմ տեսնում, ինչ չեմ տեսնում՝ էական չէ: Էականն այն է, թե ինչ է տեսնում Լեռնային Ղարաբաղի ժողովուրդը: Եվ էական է նաև, թե Լեռնային Ղարաբաղի ժողովուրդը միջազգային մեխանիզմի պայմաններում արդյոք հնարավորություն ունի՞ հետապնդել իր իրավունքներն ու անվտանգության հարցերը: Սա շատ կարևոր նրբություն է: Այս մասին այսօր կայացած մամուլի ասուլիսի ժամանակ ասաց Նիկոլ Փաշինյանը՝ շրջանցելով այն նախադասության ուղիղ արտաբերումը, որ ինքն Արցախը չի տեսնում Ադրբեջանի կազմում:

Շարունակելով խոսքը՝ Փաշինյանը նշեց. «Սա մեր պրոբլեմն է եղել... Էական չէ՝ ով է մեղավոր, ով չի մեղավոր: Ամենամեծ պրոբեմը Լեռնային Ղարաբաղին բանակցային սեղանից դուրս թողնելն է կամ դուրս մնալն է: Սա ֆունդամենային, շրջադարձային է մեզ համար: Դուք չե՞ք զգացել, որ, օրինակ, ինչքան Հայաստանն ավելի ակտիվ ու բարձր է խոսել տարբեր բաների մասին, այնքան ԼՂ-ի ձայնը մարել է: Դուրս է մնացել միջազգային տեսադաշտից: Հարցի հիմնական շահառուն ԼՂ-ի ժողովուրդն է: Ես 2018թ.-ին մի հայտարարություն արեցի, այդ ժամանակ էլ սխալ ընկալվեց...ավելի ճիշտ՝ սխալ չընկալվեց, ուղղակի այլ պրոցեսներ կային... Ես ասացի, որ ես ՀՀ վարչապետն եմ, ես ԼՂ-ի վարչապետը չեմ, որովհետև ԼՂ-ի ժողովուրդն ինձ քվե չի տվել, ինձ քվե տվել է ՀՀ ժողովուրդը: Եվ այն ժամանակ էլ, հիմա էլ, ես կարծում էի և կարծում եմ, որ ԼՂ-ի ժողովուրդն է շահառու, ինքը պետք է խոսի: ԼՂ-ի ներկայացուցիչները պետք է ունենան և՛ հնարավորություն, և պատասխանատվություն, այդ հարցերը հասցեագրելու և իրավիճակ կառավարելու: Բնականաբար, մենք էլ պետք է աջակցենք նրանց»:

Հարցին, թե արդոք որևէ բանով կաշկանդվա՞ծ է, որպեսզի հայտարարի՝ Արցախը չի լինելու Ադրբեջանի կազմում և չէ՞ որ Արցախում էլ են հայեր ապրում և նրանք էլ ունեն հայկական անձնագիր, Փաշինյանը նշեց. «Ես իհարկե կաշկանդված եմ՝ շատ բաներով՝ ԼՂ-ի բնակչության անվտանգությամբ, ՀՀ անվտանգությամբ, ՀՀ ժողովրդի անվտանգությամբ, ձեր անվտանգությամբ, բոլորի անվտանգությամբ, ՀՀ ինքնիշխանությամբ, սուվերենությամբ, անկախությամբ, ՀՀ պետական շահերով... Բա իհարկե կաշկանդված եմ... Բա ի՞նչ է ձեզ թվում... Բա որ տենց չլիներ նենց հայտարարություններ կանեի՜... իհարկե, կաշկանդված եմ»: