Հայաստանում ՆԱՏՕ-ի և ՌԴ-ի կռվի համար տարածք են պատրաստում

Վրաստանի վարչապետ Իրակլի Ղարիբաշվիլին կիրակի օրը IMEDI հեռուստաալիքի եթերում ասել է, որ իրենց երկրում իրավիճակի ապակայունացման հիմնական նպատակը Ռուսաստանի դեմ երկրորդ ճակատ բացելն է, ինչից հետո երկիրը կդառնա «պոլիգոն կամ երկրորդ Մարիուպոլ»։

Վրաստանի վարչապետը ճշգրիտ գնահատական է տվել Վրաստանում ընթացող զարգացումներին և վրաց ժողովրդին ցույց տվել, որ եթե մտնեն ՆԱՏՕ-Ռուսաստան առճակատման դաշտ, արժանանալու են ուկրաինացի ժողովրդի բախտին։

Ղարիբաշվիլին շատ պարզ բացատրել է, որ այդ դեպքում վրացիները դառնալու են փախստական՝ զուգահեռ իրենց հայրենիքը դարձնելով ավելակի վերածված մի մեծ ռազմաճակատ։

Ղարիբաշվիլին նույն հարցազրույցի ընթացքում հույս է հայտնել, որ վրացի ժողովուրդը, որ մի անգամ Սաակաշվիլու պատճառով կորցրել է իր տարածքների մի մասը, կունենա այնքան ողջախոհություն, որ պետության հաշվին այդ պարտադրվող խաղի մեջ չի մտնի։
Գերադասելի կլիներ, եթե տարածաշրջնային նման սրընթաց զարգացումների ժամանակ Հայաստանում լիներ մի ղեկավար, որ հայ ժողովրդին պարզ օրինակով ցույց տար, որ ՆԱՏՕ-ի և Ռուսաստանի արանքում հայտնվողը ճզմվում և խեղդվում է սեփական երկրի քաղաքացիների արյան ծովում։

Պատմության դառը փորձը աչքի առաջ Հայաստանի իշխանությունը գնում է Ռուսաստանի դեմ Հայաստանում երկրորդ ճակատ բացելու ճանապարհով։

Նիկոլ Փաշինյանի կողմից հայտարարված է դեմարշ՝ ընդդեմ ՀԱՊԿ-ի. նախ Հայաստանը հրաժարվեց ՀԱԿՊ զորավարժությունների անցկացումից, ապա ՀԱՊԿ գլխավոր քարտուղարի տեղակալի քվոտայից։

Անվտանգության խորհրդի քարտուղար Արմեն Գրիգորյանը ՀԱՊԿ-ից Հայաստանի քվոտայից հրաժարվելը համարում է արտաքին քաղաքականության տրամաբանության մեջ տեղավորվող քայլ, որը հենց ՀԱՊԿ-ը լքելու գործընթացի մեկնարկն է։ Հայաստանը հեռանում է ՀԱՊԿ-ից՝ չունենալով այդ ռազմական կառույցի այլընտրանքը և գտնվելով պատերազմի նախաշեմին։

Հայաստանի ռազմավարական բարձունքներն օկուպացված են ադրբեջանական զինուժի կողմից, պատերազմից երկու տարի անց հայկական բանակի արդիականացման պլան չկա, երկրի վարչապետն ասում է, որ փող ունենք, բայց զենք չի կարողանում գնել և նույն ասուլիսի ժամանակ ի լուր աշխարհի հայտարարում է, որ պատերազմն Ադրբեջանը մոտեցրել է Հայաստանի սահմաններին։

Հայաստանի ռազմաքաղաքական վիճակը լավ չէ։ Հենց այնպես չի ասում Փաշինյանը, որ Հայաստանին բան է սպառնում, իսկ այդ բանն էլ ավելի ուժեղ կսկսի սպառնալ, քանի որ ՀԱՊԿ-ից հեռանալուն զուգահեռ ՆԱՏՕ-ն է Հայաստան ուղարկում իր նախկին պաշտոնակցին։

Հայաստանում է «Ռասմուսեն Գլոբալ» միջազգային քաղաքական խորհրդատվական կազմակերպության հիմնադիր նախագահ, ՆԱՏՕ-ի նախկին գլխավոր քարտուղար Անդերս Ֆոգ Ռասմուսենը։ Նրան ընդունել է Անվտանգության խորհրդի քարտուղար Արմեն Գրիգորյանը։ Գրիգորյանը Ռասմուսենի հետ քննարկել է տարածաշրջանային անվտանգային իրավիճակը, անվտանգային մարտահրավերները, ԼՂ հիմնախնդրի կարգավորման հետ կապված հարցերը, Ադրբեջանի կողմից Լաչինի միջանցքի ապօրինի շրջափակման հետևանքով առաջացած ճգնաժամի հարցը։

Բոլոր այս հարցերը Ռուսաստանի ռազմական ներկայության տիրույթում գտնվող հարցեր են և դրանք ՆԱՏՕ նախկին գլխավոր քարտուղարի համար դարձել են ուշադրության արժանի, բայց ոչ թե խնդիրները կարգավորելու, այլ դրանք ընդդեմ ռուսական գործոնի օգտագործելու համար։

Սա նշանակում է, որ ՀՀ իշխանությունը գիտակցված ՆԱՏՕ-ն մտցնում է մի տարածք, որտեղ այդ կառույցը քարտ բլանշ է ստանում ընդդեմ ռուսական ռազմական կոնտինգենտի։ Այս ամենի հետևանքները հասկանալու համար հայ ժողովուրդը պետք է անի մի պարզ վարժություն և ուշադիր նայի ավերակների վերածված Ուկրաինային...

NEWSPRESS.am