Ընդդիմադիրին ծեծելով նստացրել են մեքենան, մեքենայի մեջ էլի ծեծելով հասցրել ՔԿ. Գեղամ Նազարյանը դրվագ պատմեց

Ես ուզում եմ հավատալ, որ այստեղ նստածներից, ներկաներից բոլորի նպատակն այն է, որ Հայաստանը լինի ավելի լավը, ավելի արդար, ավելի ուժեղ: Իսկ այն երկիրը, որտեղ արդարադատությունը կաղում է, որտեղ արդարադատությունը խնդիր ունի, ապա բոլոր ոլորտները խնդիրներ են ունենալու: Այս մասին այսօր Ազգային ժողովում հայտարարեց «Հայաստան» խմբակցության պատգամավոր Գեղամ Նազարյանը:

Գեղամ Նազարյանը փորձեց օրինակի միջոցով ներկայացնել, թե ինչ իրավիճակում է մեր այսօրվա դատաիրավական ոլորտում: 

«Պետական համալսարանի հենց մուտքի մոտ կարմիրբերետավորները փորձում էին ամենակոպիտ ձևով ուսանող Տարոն Մանուկյանին ձերբակալել: Մեկ այլ ուսանող՝ Արմենակ Նազարյանը, փորձել է թույլ չտալ այդ անմարդկային ձերբակալումը, ինչի պատճառով էլ նրան դասախոսների և ուսանողների մոտ ամենադաժան ձևով ծեծի ենթարկելով, հարվածելով, քարշ տալով տարել են ոստիկանական մեքենա, մեքենայում ևս շարունակել են հարվածել և հասցրել են ՔԿ: Մենք բողոք ենք ներկայացրել, որ արդարադատությունը հաղթի: Սակայն, ի՞նչ է տեղի ունենում: Անցնում է որոշակի ամիս, բերում են ներկայացնում են Արմենակին ինչ-որ մարդկանց, որոնք այդ գործի հետ երբևէ կապ չեն ունեցել և հարցնում նրանից, թե արդյոք ճանաչո՞ւմ է նրանց: Դե, բնականաբար, Արմենակը չճանաչելով՝ ասում է, որ չի ճանաչում: Տեղում ասում են՝ դե գործը կարճում ենք: Հիմա որ, այսպես պատգամավոր Գեղամ Մանուկյանի որդուն են վերաբերվում, բա պատկերացնո՞ւմ եք այն հասարակ ժողովրդի հետ ինչ է կատարվում: Հիմա կասեք՝ առաջ ավելի վատ էր: Ես ինքս առաջ այն իշխանությունների ամենամեծ քննադատն եմ եղել»,-նշեց Նազարյանը:

Նրա խոսքով՝ երկրի և մարդու պաշտպանվածությունը գալիս է արդարադատությունից:

«Իսկապես ես կարծում եմ, որ դատավորը պետք է շարժվի օրենքով: Ես չեմ կարծում, որ միայն կոռուպցիան է խնդիր: Բայց կարելի է գոնե նկատողություն տալ, ոչ թե նման կերպ վարվել»,- նշեց Նազարյանը: