Թուրքիայի ջանքերն էլ չօգնեցին Ուոլթերի անհեթեթ զեկույցի ընդունմանը

«Արցախի ժողովրդի խոսքն է կարևոր. ԵԽԽՎ-ն պիտի արցախցիներին լսեր»,-newspress.am-ի հետ զրույցում ասաց ԵՊՀ պատմության ֆակուլտետի դեկան Էդիկ Մինասյանը:

Նրա դիտարկմամբ՝ ԵԽԽՎ-ն պետք է տուրք չտար Ադրբեջանի խավիարային դիվանագիտությանը և չպետք է ընդուներ Միլիցա Մարկովիչի «Ադրբեջանի սահմանամերձ շրջանների բնակիչները միտումնավոր զրկված են ջրից» թեմայով հակահայկական զեկույց: Ըստ նրա՝ Սարսանգի ջրամաբարը ռազմավարական նշանակություն ունի և արցախցիներն էլ իրենց հերթին են ասում, որ Ադրբեջանը ջրի հետ կապված խնդիրներ է ստեղծում.«ստացվում է` Արցախի փոխարեն Ադրեբեջանն է բողոքում»:

Էդիկ Մինասյանի կարծիքով՝ զեկույցն ընդունվել է նավթադոլաների շնորհիվ: Բայց հստակ է նաև մի բան` հայկական սփյուռքը ևս կարող ենք որպես «նավթադոլար» դիտարկել և ասել, որ այն կարող էր առավել ակտիվ գործել և քայլեր ձեռնարկեր նմանատիպ զեկույցի չընդունման համար. հայկական պատվիրակությունը ևս պետք է ավելի ակտիվ լիներ, որպեսզի ԵԽԽՎ-ն Ադրբեջանի ջրաղացին ջուր չլցներ:

Պատմաբանի դիտարկմամբ ՝ հաջողություն էր այն, որ «Բռնության աճը Լեռնային Ղարաբաղում եւ Ադրբեջանի այլ գրավյալ տարածքներում» թեմայով բանաձեւի նախագիծը չընդունվեց: Դրա ընդունումը կարող էր վտանգել ԼՂ խաղաղ կարգավորման գործընթացը: ԵԱՀԿ Մինսկի խմբի արձագանքը դրա մասին է խոսում: Այս անհեթեթ զեկույցի մերժմամբ՝ հօդս ցնդեց ոչ միայն Ադրբեջանի, այլև Թուրքիայի ջանքերը իրականությունը խեղաթյուրելու մասով: Զեկույցի հեղինակը բրիտանացի պատգամավոր Ռոբերտ Ուոլթերն է, վերջինս արագացված կարգով Թուրքիայի քաղաքացիություն է ստացել, նրան առաջարկվել է նաև Թուրքիայի արտգործնախարարի խորհրդականի պաշտոնը: