Լֆիկին ուղղված արտոնությունների հորձանուտի մեջ խեղդվող բիզնես փոքրամասնությունն ու գլորվող տնտեսությունը (լուսանկարներ)

Կառավարությունը մարտի 9-ի նիստում, հերթական արտոնությունն է տրամադրել Սամվել Ալեքսանյանին (Լֆիկին) պատկանող ընկերությանը:

Մասնավորապես, հարկային արտոնություն է տրվել «Ալեքս տեքստիլ» ընկերությանը՝ ըստ որի, ընկերությունն ազատվում է173 մլն դրամ կազմող մաքսատուրքից (այսինքն՝ Ալեքսանյանը 173 մլն դրամ չի վճարի ՀՀ պետական բյուջե):

Իհարկե, աչքից չի կարող վրիպել այն, որ Ալեքսանյանի ընտանիքին պատկանող ընկերություններին այս իշխանությունը քաղցր աչքով է նայում ու արտոնությունների ոչ թե հոսք, այլ, այս 5 տարվա ընթացքում, մի ամբողջ հեղեղ է ուղղել Լֆիկի ընտանիքին:

Առաջին հայացքից անհասկանալի թվացող այս արտոնություններն իրականում, գոնե Փաշինյան Նիկոլի ընտանիքի համար, իրենց պատճառներն ունեն:

Երբեք չի քննարկվել այն, որ նման արտանություններ սահմանվեն բոլոր գործարարների համար: Արտոնություն սահմանվում է մեկ-երկու գործարարի համար, իսկ մյուսները՝ թեկուզ անդունդ գլորվեն՝ իրենց հետ գլորելով անգամ տնտեսությունը:

Մինչդեռ, տնտեսագետների գնահատմամբ, Հայաստանին ներքև է քաշում 5 ցուցանիշ, որոնցից առաջին երկու տեղը բիզնես փոքրամասնության շահերի պաշտպանության բացակայությունն է ու հարկերի վճարումը:

Ընտրողական այս վերաբերմունքը խոսում է այն մասին, որ Ալեքսանյան-Փաշինյան «բարձր մակարդակի» հարաբերությունները չափվում են միայն գումարով, որը պետական բյուջե մտնելու փոխարեն այլ ընտանեկան բյուջե է ուղղվում։

Ըստ շրջանառվող լուրերի՝ նախկին պատգամավոր Սամվել Ալեքսանյանն իր աջակցությունն է ցուցաբերում ներկայիս իշխանություններին: Ավելի կոնկրետ՝ մուծում է՝ բիզնեսը պահելու և նախկին կեղծարարություններն ու հանցագործությունները ջրի երես չհանելու համար:

Օրինակ՝ «City of smile» հիմնադրամի, միայն 2018թ.-ի նվիրատուների ամբողջական ցանկն ուսումնասիրելիս, պարզվեց, որ Ալեքսանյանների ընտանիքը (նրանց պատկամողբարեգործական հիմնադրամը) 10,000,000.00 դրամ նվիրատվություն էր կատարել: Չխոսենք  «City of smile»-ի հանգանակության տուփերի մասին, որոնք տեղադրված են «Երևան սիթի»-ի բոլոր խանութների բոլոր դրամարկղերի մոտ:

Եթե սա «մուծման» ձև չէ, ապա ի՞նչ է: Թեև սա մուծման միակ ձևը չէ...

Սամվել Ալեքսանյանի «մուծվելու» արդյունքում նրա բիզնես-գործունեության մեջ հարկայինը չի խառնվում, տիկին Աննան հագնում և գովազդում է «Ալեքս տեքստիլի» զգեստները, ջրվում կամ ընդհանրապես փակվում են Ալեքսանյանի անվան հետ կապված քրեական գործերը:

Էլ չենք խսում այն մասին, թե որքան թաքցրած աշխատատեղեր է նա ունեցել, ինչքան բրենդային խմիչքներ է կեղծել, որոնք վնաս են հասցրել մարդկանց առողջությանը, որքան փաստաթղթային կեղծարարություններ են հայտնաբերվել... Այդ ամենի մասին «հեղափոխությունից» հետո բարձրաձայնվեց, բայց ոչինչ չձեռնարկվեց: 

Սամվել Ալեքսանյանին պատկանող բիզնեսների արտոնյալ կարգավիճակի հետևանքով, դրանց մատակարարները 100%-ոց անպատժելիություն զգալով, ըստ շրջանառվող որոշ տեղեկությունների, բազմաթիվ մանրածախ օբյեկտներ ապրանք են մատակարարում առանց հաշիվ-ապրանքագրերի...

Ու այս ու շատ ուրիշ կեղծարարությունների համար պատժվելու փոխարեն, այսօր Լֆիկ Սամոն շարունակում է նոր արտոնություններ ստանալ՝ վարչապետի կողմից: 

Ու որքան էլ Փաշինյանը փորձի համոզել, թե՝ «Նոր զովք» սուպերմարկետի շուրջ զարգացումներն իր ձեռքի գործը չէ ու դա իբր չի արվել նրա համար, որ զարկ տա «Երևան Սիթի» խանութների ցանցի առևտրին՝ փաստերն այլ բան են հուշում:

«Ասում են՝ սարքեցին. «Նոր Զովքը» փակում են, որ «Երևան Սիթին», «Քարֆուրը» ավելի լավ աշխատի. եղավ, ձեր ասածն է»...

Այս մասին Փաշինյանն ասել էր Գերմանիայում տեղի ունեցած՝ հայ համայնքի հետ հանդիպման ժամանակ, թեև ոչ ոք նրան այդ մասին չհարցրեց: 

Դե ասում են՝ արջն իր ահից է գոռում. Լֆիկի «հոժար կամքով» արտադրված  «Վարչապետ» անվամբ՝ ՀՀ զինանշանով ու «Դուխով» թավշյա օղիները, «Նիկոլ» անունով կոնֆետներն ու Նիկոլենց նրա «սիրահոժար մուծվելը»՝ վկա...

Արմինե Մկրտումյան

Ստորև՝ լուսանկարներ «Երևան Սիթին» խանութների ցանցից...