Սերժ Սարգսյանի դեմ ցուցմունք տվող Սևանը սաղին «քցել է». «Ֆլեշ» ընկերության նախկին փոխտնօրենը ցուցմունք է տվել

Երևան քաղաքի ընդհանուր իրավասության դատարանի Ավան և Նոր Նորք նստավայրում, դատավոր Վահե Միսակյանի նախագահությամբ ՀՀ երրորդ նախագահ Սերժ Սարգսյանի և մյուսների գործով հարցաքննվել է գործով վկաներից Եղիշե Խաչատրյանը:

Գործով վկան պատմել է, որ սկզբում չէր էլ հիշում գյուղնախարարության մրցույթի մասին, բայց նախաքննության ընթացքում որոշ փաստաթղթեր տեսնելուց հետո, հիշել է, որ «Ֆլեշ» ընկերությունը գնային առաջարկ է ներկայացրել այդ մրցույթում. «Հնարավոր է, որ իրենք կառավարության որոշումով այդ գործընթացը տվել են «Ֆլեշ» ՍՊԸ-ին՝ կատարելու համար»:

Ըստ վկայի՝ «Ֆլեշ» ընկերության առաջարկած գինը պայմանավորված է եղել նաև դիզվառելիքի որակով. «Սևանը չէր կարող այդպիսի վառելիք բերել, քանի որ պարսկական էր բերում միշտ: Այդպիսի դիզվառելիք Իրանից չէին կարող բերել, որ համապատասխաներ ձմեռային պայմաններին, մենք բերում էինք Եվրոպայից»:

Եղիշե Խաչատրյանը նշել է, թե Սևան Քոչարյանի ընկերությունը չէր կարող ծրագրի պայմաններն ապահովել, և, որ դա ի վիճակի էին անել միայն շուկայում գործող խոշոր ընկերությունները.

«Ես քննիչին Սևանի մասին շատ բան չեմ պատմել, չեմ ուզեցել. առանձին իրեն ասել եմ, որ սենց-սենց, բայց չի գրանցվել, չեմ թողել, որ գրանցի: Սևանը, որտեղ որ աշխատել է, քցել է բոլորին: Աշխատում էր ՎԻԱԴ ֆիրմայում, հանեցին, որովհետև քցել էր իրանց: Յուղի ֆիրմա էր հիմնականում, բայց դիզվառելիքով էլ էր զբաղվում: Սևանը դիզվառելիքից բան չի հասկանում, ինքը գիտի՝ դիզվառելիքը ապրանք ա, որն առնում-ծախում են, բայց թե դա ինչ ապրանք ա, իր պարամետրերն ինչ են»:

Հիշեցնենք, որ ըստ մեղադրական եզրակացության՝ Սերժ Սարգսյանի կազմակերպմամբ և Բարսեղ Բեգլարյանի դրդմամբ, Սամվել Գալստյանի ու Գևորգ Հարությունյանի օժանդակությամբ, Սերգո Կարապետյանի կողմից 2013 թվականի հունվարի 25-ից փետրվարի 7-ն ընկած ժամանակահատվածում ՀՀ կառավարության պահուստային ֆոնդից վատնվել է պետական աջակցության ծրագրերի իրականացման ընթացքում իրացված 15.391.765 լիտր դիզելային վառելիքի համար հատկացված սուբսիդիայի առանձնապես խոշոր չափերով գումարը՝ 489.160.310 ՀՀ դրամ: