Լավ, ռուս խաղաղապահներին ասում ենք՝ գնացեք. կա՞ մեկ այլ երկիր, որ պատրաստ է խաղաղապահներ բերել. Սերժ Սարգսյան

Ես ոգևորված չեմ ՌԴ որոշ պաշտոնյաների հայտարարություններով և անթույլատրելի եմ համարում, երբ ահաբեկչին և ահաբեկչի թիրախին դնում են նույն հարթության վրա և երկուսին էլ հանդարտության կոչ են անում: Այս մասին լրագրողների հետ զրուցյում նշեց ՀՀ երրորդ նախագահ Սերժ Սարգսյանը:

«Դա շատ նման է նրան, որ 1980-ականների վերջին ԽՍՀՄ գերագույն խորհրդի նախագահ կար, ու երբ ժողովուրդներն իրար հետ կռվում էին, ասում էր՝ կլուբնիկի պատճառով են իրար հետ կռվում: Մյուս կողմից էլ մենք գոնե երեկ տեսանք Ռուսաստանի ՊՆ հասցեական հայտարարությունը: Իսկ ուրիշ ավելի հստակ հայտարարություններ եղա՞ն: Այսօր տեսա, որ Ֆրանսիայի ԱԳՆ-ն ևս հասցեական հայտարարություն արեց, բայց մեր տարածաշրջանում կա ԵՄ հատուկ ներկայացուցիչ, ով պարտավոր է այդ իրադարձություններից մանրամասն տեղյակ լինել: Իսկ նա ի՞նչ ասաց: Ի՞նչ է նշանակում արյունալի իրադարձություններ: Դա ի՞նչ ասելու բան էր: Ուզում եմ ասել, որ ամեն ինչը պետք է միշտ դիտարկել համեմատության մեջ:

Լավ, ռուս խաղաղապահներին քննադատում ենք, ասում ենք՝ գնացեք: Կա՞ մեկ այլ երկիր, որ պատրաստ է խաղաղապահներ բերել: Եթե չկա, ինչո՞ւ են ավել պակաս խոսում: Իսկ ԼՂՀ-ն այսօր ի վիճակի՞ է դիմակայելու Ադրբեջանին առանց խաղաղապահների, հտկապես, որ Հայաստանն արդեն ձեռքերը լվացել է, ՀՀ-ն այլևս իրեն չի համարում անվտանգության երաշխավոր: Բա էդ 120 հազարը ո՞նց պետք է դիմակայի 10 մլն-ին: Ուրեմն անհրաժեշտություն է այսօր խաղաղապահների առկայությունն այնտեղ»,-ընդգծեց նախկին նախագահը: