Ում քավորությամբ և քանի արցախցի կընտրի Ադրբեջանի կազմում կյանքը. Արայիկ Հարությունյանի վտանգավոր առաջարկը Արցախյան 44-օրյա պատերազմի պարտությունից հետո
Նիկոլ Փաշինյանի բացարձակ վերահսկողության տակ գործող Արայիկ Հարությունյանը այսօր առաջին անգամ հայտարարել է Արցախը Ադրբեջանի կազմում չտեսնելու իր հստակ նպատակի մասին և դրանով հակադրվել Հայաստանի ղեկավարի վարած քաղաքական կուրսին: Այսօր հրավիրված Անվտանգության խորհրդի նիստում Հարությունյանը տառացիորեն ասել է հետևյալը. «Ադրբեջանական կողմը իր խողովակներով փոխանցել է մեզ, որ կամ ընդունում եք ինտեգրացիոն քաղաքականությունը, կամ առկա խնդիրներին որևէ լուծում չի լինելու, հակառակը՝ լինելու են ավելի կոշտ և կտրուկ քայլեր: Մենք չենք ընդունել, չենք ընդունում և այսօր ուզում եմ նորից հայտարարել՝ այն միայն Անվտանգության խորհրդի որոշում չէ, այլ մեր ժողովրդի գերակշիռ մեծամասնությունն ընդունում է, որ մենք մեր անկախության իրավունքից, ինքնորոշման իրավունքից չենք շեղվելու: Իսկ դա նշանակում է, որ առաջիկայում ունենալու ենք տարբեր զարգացումներ, իրավիճակներ, որոնց պետք է դիմակայենք:
Մենք ընտրում ենք՝ կամ շարունակել պայքարը, որն ընտրել ենք, կամ, եթե կան այնպիսի տրամադրություններ հանրության մեջ, որ պետք է ընդունել Ադրբեջանի կողմից ներկայացված առաջարկությունը, ապա հնարավորություն ունեն իրենց քաղաքացիական իրավունքների շրջանակում բարձրաձայնել և ասել, որ մեր ընտրած ճանապարհը սխալ է, փորձեն ձևավորել այդ տրամադրությունները, երկրում ձևավորեն նոր իշխանություն: Բայց քանի որ մենք ընտրել ենք պայքարի ճանապարհը, խնդրում եմ առաջին հերթին հարգել մեր որոշումը և ամեն նման մի երևույթի չարձագանքել և ներքաղաքական որևէ ենթատեքստ չտալ»:
Հարությունյանի հայտարարությունը ուշագրավ է մի քանի դրվագով. նախ, նա չի բացառում, որ Արցախում կարող են գտնվել մարդիկ, որոնք կցանկանան ապրել Ադրբեջանի կազմում: Հարությունյանը ասում է, որ այդ դեպքում չի պատրաստվում լինել նրանց ղեկավարը, այնուհետեւ խոսում է նոր մարտահրավերներին դիմագրավելու անհրաժեշտության մասին, ինչպիսին կարող են ստանալ Հայաստանից, երբ Փաշինյանը զրկի նրանց Հայաստանի բյուջեից տրվող փողից' չհանձնվելու պատճառով:
Այսպիսով, Արայիկ Հարությունյանը մի ծայրահեղ վտանգավոր ելք է առաջարկում' պատուհան բացելով Արցախում ապրող այն քաղաքացիների համար, որոնք կցանկանան ինտեգրվել Ադրբեջանին, կամ, ավելի ճիշտ, դառնալ Ադրբեջանի անձնագիր ունեցող քաղաքացի եւ ստանալ սոցիալական տարատեսակ երաշխիքներ:
Արցախի վերջի սկիզբը կլինի ոչ թե այն, որ 120 հազար հայ կզրկվի Հայաստանի բյուջեից տրվող ֆինանսավորումից, այլ այն, որ կարող են հայտնվել առաջին անհայրենիքները ու որոշեն ընդունել Արայիկ Հարությունյանի առաջարկը: Հաշվի առնելով այն, որ տեւական ժամանակ է Փաշինյանը Արցախ է ուղարկել Սամվել Բաբայանին, ով դեմ չէ, որ Կաշենի հանքում ներդրում անի Ադրբեջանն ու հասույթը հասնի ադրբեջանցիներին, չի բացառվում, որ հենց Սամվել Բաբայանի քավորությամբ մի խումբ արցախցիներ որոշեն ընդունել ադրբեջանացման առաջարկը' իրենց ղեկավար տեսնելով արդեն Սամվել Բաբայանին, որը այդ դեպքում կլինի ոչ թե Արցախի ղեկավար, այլ ինչ որ վարչակազմի' Ադրբեջանի ուղիղ ենթակայության տակ:
Էրեբունիում հայրը փորձել է բռնաբարել դստերը. «Հրապարակ»
Փաշինյանը մատնեց, թե ինչ է ծրագրել Տիգրանաշենի հանձնման հետ կապված. «Հրապարակ»
Ռուսաստանի Դաշնությունից Հայաստան բնական գազի մատակարարումը ժամանակավորապես կդադարեցվի
Կիևյան կամրջի տակ հայտնաբերվել է տղամարդու մարմին, իսկ կամրջի վրա՝ նրան պատկանող «բարսետկան»
Աջ ականջը ձախ ձեռքով չեն քորում. չարժեր ՔՊ մտնել «Բիզնես» «կլասով». Քաղաքագետ
Կան ղեկավարներ, որոնք չեն հասնում թոշակի տարիքին, քանի որ ժողովուրդը նրանց կախում է տուռնիկից. Քոչար...
Լարված և անառողջ մթնոլորտ. ի՞նչ է կատարվում Մ.Աբեղյանի անվան գրականության ինստիտուտում
Եթե Ռուսաստանը թանկացնի գազի գինը՝ Հայաստանն էլ կտեսնի, թե ինչ կա, որ կարելի է թանկացնել. Նիկոլ Փաշի...
ՀՀ պահեստազորի սպաների միությունը բաց նամակով դիմել է ԱԱԾ տնօրեն Անդրանիկ Սիմոնյանին
Դրամահավաք՝ 44-օրյա պատերազմում անմահացած Յակով Սարգսյանի մոր բուժման նպատակով
