Ստեփանակերտի Սուրբ Հակոբ եկեղեցում տեղի է ունեցել ադրբեջանական դիվերսիայից զոհված ոստիկանների հոգեհանգիստը (տեսանյութ)

Ստեփանակերտի Սուրբ Հակոբ եկեղեցում տեղի է ունեցել ադրբեջանական դիվերսիայից զոհված ոստիկանների հոգեհանգիստը:

Հիշեցնենք, որ մարտի 5-ին Ադրբեջանի դիվերսիոն ներթափանցման ժամանակ զոհվել էին ոստիկաններ՝ Արմեն Բաբայանը, Դավիթ Դանիելյանը և Արարատ Գասպարյանը: Արմեն Բաբայանի և Դավիթ Դանիելյանի հուղարկավորությունը տեղի կունենա վաղը՝ մարտի 7-ին Ստեփանակերտի եղբայրական հուշահամալիր-պանթեոնում, Արարատ Գասպարյանի հուղարկավորությունը՝ Ասկերանի շրջանի Նորագյուղ համայնքում:

Ավելի վաղ հայտնել էինք, որ մարտի 5-ի առավոտյան Արցախի ՊԲ-ն հաղորդագրություն տարածեց այն մասին, որ ժամը 10։00-ի սահմաններում ադրբեջանական զինուժի դիվերսիոն խումբը «Խայփալու» կոչվող տեղանքում թիրախավորել և կրակ է արձակել ՆԳՆ ոստիկանության անձնագրային և վիզաների վարչության անձնակազմի հերթափոխի մեքենայի վրա։

Քիչ անց ՆԳՆ-ն հայտնել էր ոստիկանների անունները. թշնամու գործողությունների հետևանքով զոհվել են փոխգնդապետ Արմեն Մայորի Բաբայանը, մայոր Դավիթ Վալերիի Դանիելյանը, լեյտենանտ Արարատ Թելմանի Գասպարյանը: Լեյտենանտ Դավիթ Աշոտի Հովսեփյանը ստացել է կրծքավանդակի հրազենային վիրավորում: Արցախի առողջապահության նախարարությունն ավելի ուշ տեղեկացրել է, որ վիրավոր ոստիկանը վերակենդանացման բաժանմունքում է՝ բժիշկների հսկողության տակ, վիճակը գնահատվում է կայուն ծանր։