Երևանում կհնչի Միքայել Թարիվերդիևի «Սպասում» մոնոօպերայի համերգային կատարումը

Կոմիտասի անվան կամերային երաժշտության տանը մարտի 10-ին կներկայացվի Միքայել Թարիվերդիևի «Սպասում» մոնոօպերայի համերգային կատարումը:

Համերգին ելույթ կունենան Վարսենիկ Ավանյանը (մեցցո սոպրանո), Սյուզաննա Մելքոնյանը (սոպրանո), Արմեն Բադալյանը (տենոր) և Վասիլի Ռոլիչը (դաշնամուր)։ Համերգի առանցքն է կազմում Թարիվերդիևի «Սպասում» մոնոօպերան, որտեղից համերգը ստացել է իր խորագիրը։

Մոնոօպերան կկատարի Ալ. Սպենդիարյանի անվան օպերայի և բալետի ազգային ակադեմիական թատրոնի մեներգչուհի, մեցցո-սոպրանո Վարսենիկ Ավանյանը։ Ստեղծագործությունը կներկայացվի դաշնամուրի նվագակցությամբ։

«Սպասում» մոնոօպերան գրվել է 1985 թվականին` Ռոբերտ Ռոժդեստվենսկու տեքստերի հիման վրա։ Օպերայում կա միայն մեկ կերպար՝ «Նա», հերոսուհին, որը ժամադրության է գալիս տղամարդուց 32 րոպե շուտ և սպասման ժամանակ վերապրում է հույզերի մի մեծ փոթորիկ, որոնք նա արտահայտում է մենախոսության տեսքով։

Ժամանակակից կինը, ծանրաբեռնված իր առօրյա խնդիրներով, պարտականություններով և սոցիալական գործառույթներով, ժամադրության է գալիս իր սիրելիի մոտ և սպասում նրան ժամացույցի տակ: Այն, ինչ կատարվում է նրա հոգում այդ երեսուներկու րոպեների ընթացքում՝ կրքոտ բոցավառությունից մինչև հուսահատություն և գրեթե հուսահատություն, պատկերված է Թարիվերդիևի երաժշտության մեջ՝ գրավիչ պարզությամբ և ճշմարտացիությամբ։

Համերգի երկրորդ մասում կհնչեն «Հնագույն ռոմանս», «Մի անհետացիր», «Երաժշտություն» (ի հիշատակ Շոպենի), «Ինձ դուր է գալիս»՝ «Ճակատագրի հեգնանք կամ բաղնիքդ անուշ» ֆիլմից, «Երկուսը սրճարանում»՝ «Գարնան 17 ակնթարթ» ֆիլմից, նախերգանք՝ «Կորուսյալ արշավախումբը» ֆիլմից, «Երկու մեղեդի»՝ «Ճակատագրի հեգնանք» ֆիլմից, «Երեկոները» և «Փոքրիկ իշխան» ստեղծագործությունները: