Կարմրուկի առաջին դեպքը Հայաստան է ներթափանցել արտերկրից, հիվանդացել է բալիկ. նախարարը մանրամասներ հայտնեց

Մարտի 6-ին՝ առավոտյան ժամը 11-ի դրությամբ, գրանցվել է կարմրուկով հաստատված 20 դեպք, որոնցից 19-ը հոսպիտալացված է, մեկը՝ դուրս է գրվել: Այս մասին այսօր հրավիրված հրատապ մամուլի ասուլիսի ժամանակ ասաց Առողջապահության նախարար Անահիտ Ավանեսյանը: 

«Բոլոր պացիենտների վիիճակը միջին ծանրության է, նրանք գտնվում են բժիշկների հսկողության տակ: Ամբողջ գործընթացը կազմակերպվում է ԱՀԿ-ի կողմից հաստատված, այս դեպքերով օգտագործվող միջազգային ուղեցույցերին հաապատասխան: Հիվանդներից 15-ը երեխա է, 5-ը՝ մեծահասակ»,- ասաց Ավանեսյանը: 

Նա հիշեցրեց կարմրուկի ախտանշանները, որպեսզի մարդիկ ժամանակին կողմնորոշվեն և դիմեն բժշկի:

«Կարմրուկը սուր վարակիչ հվանդություն է, որը տարածվում է օդակաթիլային ճանապարհով: Վերջին ընթացքում՝ 2022 թվականից սկսած, ԱՀԿ 27 երկրների շրջանում, բավականին աշխույժ է: Մեր համաճարակաբանական ընդհանուր հետազոտությունները ցույց են տալիս, որ առաջին դեպքը Հայաստան է ներթափանցել արտերկրից, հիվանդացել է բալիկ, որից հետո վարակվել են նաև այլ անձինք»,- ասաց նախարարը: 

Նա նշեց, որ իրագործվում են մի շարք հրատապ միջոցառումներ, նաև որոշակի փոփոխություններ են իրականացնում ազգային օրացույցով սահմանված պատվաստումները ակտիվացնելու համար: 

Նախարարը կարևորեց վաղ հայտնաբերումը, կոնտակտների շրջանակի հստակ պարզաբանումը, 72 ժամվա ընթացքում կոնտակտավորների կանխարգելիչ պատվաստումը և նրանց մեկուսացումն ու վարակի շղթան կոտրելու միջոցառումը:Նա հիշեցրեց, որ Կարմրուկի կանխարգելման ամենագործուն միջոցը պատվաստումն է: