Հերթական սպառնալիքը. Ալիևի թիրախում ատոմակայանն է

Ադրբեջանի արտաքին գործերի նախարար Ջեյհուն Բայրամովը հանդիպել է Ատոմային էներգիայի միջազգային գործակալության (ՄԱԳԱՏԷ) գլխավոր տնօրեն Ռաֆայել Գրոսիի հետ։

Հանդիպման ընթացքում կողմերը քննարկել են Ադրբեջանի և ՄԱԳԱՏԷ-ի միջև համագործակցության, միջուկային անվտանգության հարցեր, անդրադարձ է կատարվել նաև հայկական Մեծամորի ատոմակայանին։

Ջեյհուն Բայրամովն ասել է, որ Ադրբեջանը մեծ նշանակություն է տալիս միջուկային անվտանգության ապահովմանը` կարևորելով Մեծամորի ատոմակայանի շահագործման ընթացքում այդ գործակալության կողմից սահմանված անվտանգության չափանիշների պահպանումը և պնդել է, թե Հայաստանն օգտագործում է «հնացած տեխնոլոգիաներ»։

Հայաստանի ատոմակայանի դեմ ադրբեջանական արշավանքը նոր չի սկսել, բայց այդ արշավը մեծ թափով շարունակվում է հատկապես 2020 թվականի 44 օրյա պատերազմում Փաշինյանի կրած պարտությունից հետո։

Ալիևը Փաշինյանի վերընտրվելու պատճառով ողջ հայ ժողովրդին համարում է կապիտուլացված ու շարունակում մեր առաջ դնել նորանոր պահանջներ։

Ալիևը կռվում է մի քանի ֆրոնտում՝ միանգամից։ Մեկ միջազգային դատարաններում Հայաստանի դեմ դատական հայցեր է ներկայացնում՝ պահանջելով ռեպարացիաներ, մեկ Հայաստանին փորձում զրկել ռազմավարական նշանակություն ունեցող օբյեկտներից՝ ինչպիսին ատոմակայանն է։

Բաքուն պնդում է, թե Մեծամորի ԱԷԿ-ը կառուցվել է նույն տեխնոլոգիայով, որը կիրառվել է Չեռնոբիլում և պետք է փակվի։ Հայաստանի ղեկավարությունից ցավալիորեն  այս ամենը չի ստանում որևէ պատասխան։ Նույն միջազգային կառույցներում Հայաստանը չի բարձրացնում հարցը, որ Հարավային Կովկասում միակը համարվող Մեծամորի ատոմակայանը, որը գտնվում է Երևանից 36 հեռավորության վրա, չպետք է փակվի, որովհետև փակումը նոր զենք է լինելու Թուրքիայի և Ադրբեջանի ձեռքում։

Հայաստանի իշխանությունն անգամ չի օգտագործում միջազգային փորձագետների խմբի ուսումնասիրությունը, որը փաստել է, որ Մեծամորում որևէ վտանգ չի կարող լինել և ատոմակայանը հանդիսանում է Հայաստանի էներգետիկ անկախության կարևոր ձեռքբերումը։

Պարզ է, որ Թուրքիայի և Ադրբեջանի կոկորդին է մնացած ոսկոր է Մեծամորի ատոմակայանն, ու այդ տանդեմը ջանք չի խնայում այն վերացնելու համար։

Ադրբեջանի պես նույն պահանջը մեզ ներկայացնում է նաև Թուրքիան, և չի բացառվում, որ Թուրքիայի հետ հարաբերությունների հաստատման գնացող ՀՀ իշխանությունն ատոմակայանի հետ կապված պահանջը ևս բավարարի։

Նշենք, որ հայկական ԱԷԿ-ը թուրքական սահմանից 16 կմ է հեռու, Թուրքիան կառուցում է իր սեփական Ակույուի ատոմակայանը և չի բացառվում, որ թուրք-ադրբեջանական վայնասունն էլ ավելի սրվի, երբ արդեն շահագործվի Թուրքիայում կառուցված ատոմակայանը, ինչից հետո Հայաստանին կպարտադրվի փակել Մեծամորի ատոմակայանը։