Գործարար համայնքի և պետության համագործակցությունը նշանակալի ձեռքբերումների է հանգեցրել. Վահան Քերոբյան (տեսանյութ)

Գործարար համայնքի և պետության արդյունավետ համագործակցությունը նշանակալի ձեռքբերումների է հանգեցրել: Այս մասին Հայաստանում Ամերիկայի առևտրի պալատի ներկայացուցիչների հետ հանդիպման ժամանակ նշել է ՀՀ էկոնոմիկայի նախարար Վահան Քերոբյանը:

Նախարարությունից հայտնում են, որ հանդիպման սկզբում նախարարը շնորհավորել է բոլորին Գործարարի օրվա կապակցությամբ և բարձր գնահատել գործարար համայնքի դերը մեր երկրի ապագայի զարգացման գործում։

«Ուրախությամբ պետք է նշեմ, որ գործարար համայնքի և պետության արդյունավետ համագործակցությունը նշանակալի ձեռքբերումների է հանգեցրել։ Ավելին, համախառն ներքին արդյունքը աճել է 12.6 տոկոսով, արտահանման ծավալը՝ 77.7 տոկոսով, իսկ ներմուծումը՝ 63.5 տոկոսով, ստեղծվել է առավել քան 44 հազար նոր աշխատատեղ։ Սա բացարձակ ռեկորդ է Հայաստանի պատմության ընթացքում։

Այս թվերը վկայում են մեր գործարար համայնքի ուշագրավ ձեռքբերումների և նրանց հաջողությանն աջակցելու կառավարության հանձնառության մասին»,- նշել է Վահան Քերոբյանը։

Հանդիպման ընթացքում ներկայացվել են նախարարության՝ 2022 թվականին ընդունված և ուժի մեջ մտած Հայաստանի գործարար միջավայրի բարելավմանն ուղղված ծրագրերն ու բարեփոխումները։