Ընտանեկան կապերը` լուրջ մարտահրավեր Հայաստանի համար

Դիվանագիտական կորպուսներն ու եվրոպացի պաշտոնյանները, մեկը մյուսի հետևից, Հայաստանի իշխանություններին հորդորում են վերջ տալ կոռուպցիային ու սկսել աշխատել հանուն Հայաստանի:

«Մի երկրում, որի խորհրդարանում կան մեծ թվով հաջողակ գործարարներ, որի կառավարությունում առկա են մեծ թվով գործարարներ ու հարուստ մարդիկ, շահերի բախման հարցը մեծ կարևորություն է ստանում: Արժանավորների իշխանությունը չի կարող կառուցվել առանց մտերիմներին իշխանության նշանակելու պրակտիկայի դեմ պայքարի։ Որևէ երկրում, որտեղ ընտանեկան կապերն ամուր են, սա լուրջ մարտահրավեր է»,- ասել է ԵՄ դեսպանը։ Սա Հայաստանում Եվրամիության պատվիրակության ղեկավար Պյոտր Սվիտալսկի
կողմից ՀՀ իշխանություններին ուղղված կոչ է ու պահանջ` վերջ տալ ծանոթ- բարեկամ –խնամի- սանիկ կապերին ու արժանապատիվ երկիր կառուցել

Ամիսներ առաջ էլ ՀՀ-ում ԱՄՆ դեսպանը խոսեց Հայաստանում առկա կոռուպցիայի ու նրա չափերի մասին: Մինչ այժմ Հայաստանը կոռուպցիայի դեմ պայքարում է դասական ձևով. նախ գրանտային ծրագրեր են մշակվում ու այդ փողերը մեջ-մեջ անելով` պայքարում կոռուպցիայի դեմ: Հետո նույն դասականությամբ` ստեղծվում է հակակոռուպցիոն մարմին, որի ղեկավար կազմում են ոչ ավել, ոչ պակաս Հայաստանի վարչապետ Հովիկ Աբրահամյանը ու ֆինանսների նախարար Գագիկ Խաչատրյանը:

Ասել է թե` կոռուպցիան այնտեղ է, որտեղ փողն է: Իսկ Հայաստանը փոքր երկիր է, փողատերերն էլ հայտնի են: Մնում է մարմինը աշխատի, բայց այդ և նմանատիպ մարմինները մի տեսակ ալերգիա ունեն պայքարելու փողատերերի դեմ:

Ըստ ԵՄ պաշտոնյայի` ամեն շաբաթ փաստաթուղթ է ստորագրվում հայկական պետական ու ոչ պետական կառույցներին 1 միլիոն եվրո տրամադրելու մասին, որը պետք է ուղղվի ժողովրդավարության զարգացմանը, կոռուպցիայի դեմ պայքարին, թափանցիկության մեծացմանը:

Բայց նույն դասական ձևով ծախսվում են այդ փողերը: Իսկ Հայաստանում կոռուպցիայի, ժողովրդավարության ու թափանցիկության առումով ունենք այն` ինչ ունենք:
Պարզապես ժամանակ առ ժամանակ օտարերկրյա կազմակերպությունները նվազեցնում են Հայաստանին հատկացվող գումարների չափը, երբեմն էլ, հայտարարության տեսքով, կարմիր քարտ են ցույց տալիս կոռուպցիայի դեմ պայքարողներին: