Նախատեսվում է ընդլայնել արտամարմնային բեղմնավորման ծրագիրը

ՀՀ առողջապահության նախարար Անահիտ Ավանեսյանը ԱԺ-կառավարություն հարցուպատասխանի ժամանակ ասաց, որ նոր որոշմամբ ոչ թե սահմանվեց արտամարմնային բեղմնավորման ծրագրից օգտվողների համար նոր տարիք, այլ՝ արդեն իսկ եղած ծրագիրը, որի շեմը 35 տարին էր, ընդլայնեցին շատ ավելի մեծ շահառուների խմբի համար:

Նրա խոսքով՝ եթե 2022թ. այս ծրագրում ընդգրկվելու համար եղել է մոտ 900 դիմում, ապա 2023թ. հունվար-փետրվարին՝ 750-ից ավելի:

«Սա նշանակում է, որ ծրագիրը սպասված էր: Տարեցտարի վերանայելու ենք ծրագիրն ու ընդլայնելու ենք շրջանակները»,-ասաց նա։

Խոսելով սահմանված տարիքային շեմի մասին՝ նախարարը պարզաբանել է․ այն սահմանված է՝ ելնելով բժշկական ցուցումներից, արդյունավետությունից:

«Փորձը ցույց է տալիս, որ որքան բարձր է տարիքը, այնքան երեխայի ծնվելու հավանականությունն ավելի ցածր է, կողմնակի ազդեցությունը կնոջ առողջության վրա՝ ավելի ծանր»,-ասաց նախարարը։

Անահիտ Ավանեսյանը նշել է, որ նախարարությունը խնդրանքներ է ստանում, որ ընդլայնեն ծրագիրը:

«Մենք դա միանշանակ նախատեսում ենք։ Առաջիկա վեց ամիսների արդյունքները կամփոփենք և կտեսնենք, թե ինչպես ենք ծրագրի շրջանակներն ընդլայնելու»,-ըդգծեց նա։