Արևմուտքը փորձում է բացել Արցախ-Հայաստան առաջնագիծը՝ ստիպելով ՌԴ-ին ծավալել գործողություններ ևս մի քանի թեժ կետերում. Աննա Աբրահամյան

Միջազգայնագետ Աննա Աբրահամյանը տելեգրամյան իր ալիքում մեկնաբանել է Bloomberg-ի «Բախմուտի (Արտյոմովսկի) գրավումը քայլ կլինի դեպի այն, որ Ռուսաստանը կվերցնի Ուկրաինայի Դոնբասի ողջ շրջանը, որը նախագահ Վլադիմիր Պուտինը հայտարարել է Ռուսաստանի մաս» հոդվածը:

Աբրահամյանը, մասնավորապես, գրել է.

«Հենց Բախմուտի վերջնական վերցման դեմ է ներկայումս Արևմուտքը մղում ուկրաինացիներին՝ հարձակում գործել Պրիդնեստրովիայի վրա, ինչպես նաև վերստին փորձել և բացել Արցախ/Հայաստան առաջնագիծը՝ ստիպելով ՌԴ-ին ծավալել գործողություններ ևս մի քանի թեժ կետերում։ Բերելով ՌԴ-ին նման բազմառաջնագիծ ներգրավվածության՝ Արևմուտքը ժամանակ կշահի վերազինել ու վերակարգավորել ուկրաինական ԶՈւ և պատրաստվել ամբողջական հակահարձակման՝ մարտի երկրորդ կեսից մինչ ապրիլ ժամանակահատվածում։

Մարտի երկրորդ կես կամ ապրիլ ժամանակահատվածները վերջին օրերս շատ են բարձրաձայնվում տարատեսակ ուկրաինական պաշտոնյաների կողմից, ինչպես նաև արևմտյան էքսպերտային շրջանակներից և ԶԼՄ-ներում։

ՌԴ-ն ինքը ծրագրել է Բախմուտի վերջնական վերցմամբ հարկադրել հակառակորդ[ներ]ին նստել բանակցությունների սեղանի շուրջ, ասել է թե՝ ՌԴ-ն ունի շատ սեղմ ժամանակ [մարտի առաջին կես] և շատ սեղմ պայմաններ [ցանկացած գնով չներգրավվել հավելյալ հնարավոր ֆրոնտներում]՝ Բախմուտի գրավմամբ ստիպել վերջ դնել ռազմական գործողություններին։

Արևմուտքն իր հերթին, ընդունելով ուկրաինական բանակի վերազինման/վերակազմավորման հետ կապված բոլոր բարդությունները, նպատակ ունի շարունակել ՌԴ-ն մաշեցնող ու ըստ այդմ ձգձգվող ռազմական գործողություններ՝ Պենտագոնի ընդունմամբ - մոտ 3 տարի»։